فيديو.. " سيارة للدهس " و غضب على فيس بوك وتويتر

سادت حالة من الغضب، والاستنكار الشديدين على مواقع التواصل الاجتماعى "فيس بوك" و"تويتر" إثر نشر خبر الدهس الذى تعرض له طلبة كلية الطب البيطرى بجامعة المنصورة من قبل سائق سيارة العميد، والذى نجم عنه إصابات، وكسور، وانهيارات عصبية لدى الفتيات خاصة، واهتمت صفحة " كلنا مينا دانيال "، بإبراز الخبر، حيث عبر الأعضاء على الصفحة ومعظمهم من الشباب عن استيائهم لتعرض الطلاب للدهس وعبرت عن ذلك إحدى المشاركات، تقول:" هو الدهس بقى موضة، ولا إيه، ولا حد كمان خطف السواق ودهس الناس"، وتقول مشاركة أخرى:" اللى راكب العربية دى ركبها من فلوسنا، إحنا فلوس الشعب اللى بيسرقوها يصرفوها على أنفسهم، والشعب يتحرق، هقول إيه بس والله صعبان على دم شهداء الثورة"، وتقول إحدى الطالبات:" حسبي الله ونعم الوكيل فى عميد طب بيطرى المنصورة ، ده كفاية اللى عمله فى الطلبة وكم الإهانات وضياع المستقبل ، ده اضطهد واحد لحد ما جاله حالة نفسية ومات الله يرحمه"، وسخرت إحدى المشاركات من الحدث قائلة:" بكره اللى هيشترى عربية هيطلع رخصة سواقة ودهس، وسلملى على القانون"، كما انتشرت إفيهات :" السيارة فى التليين وبعدين الدهس"، " سيارة للبيع دهس 4 شيلة واحدة"، وغيرها.
واتهمت إحدى المشاركات الرئيس المخلوع بأن سياساته ونظامه هو السبب فى قلة الرحمة بين المصريين، قالت:" هو كل واحد ممكن بالعربية بتاعته يدهس أى حد، هو أصبح أى حد يموت مش مهم، إيه الجبروت وعدم الرحمة ديه اللى رباها المخلوع فى الناس"، وتقول مشاركة:" يا جماعة هقولكم نصيحة مهمة، محدش يتظاهر ولا يمشي فى الشارع ولا حتى ع الرصيف، الأحسن محدش ينزل من بيته ولا يفتح بقه، ولا يقول رأيه عشان اى حد بيعمل أى حاجة من الحاجات دى دلوقت بيداس بالعربيات والمدرعات"، وقالت مشاركة بدت أنها لإحدى الطالبات، قالت:" كل يوم فى الكلية بيهتفوا ضده، ودول برضو مفيش إحساس وقاعدين ، مفيش كرامة ولا إيه؟ يسيبها بقى حرام الناس الناس مش عوزاه هو هيقعد بالعافية؟".
من ناحية أخرى نشبت معارك كلامية بين الأعضاء على الصفحات ممن استنكروا الدهس ومن دافعوا عن موقف السائق متهمين الطلاب بالبلطجة، ومحاولة تكسير سيارة العميد.