مدونة" عم محسن": المشير لبس البدلة والشعب لبس في الحيطة

تناولت مدونة "عم محسن" قضية نزول المشير لوسط البلد بعنوان يقول :"المشير لبس البدلة والشعب لبس في الحيطة"
وقال عم محسن من يوم خلع مبارك وانا بسمع الكلمة دي "الجيش حمي الثورة" كنت نفسي اعرف كيف حمي الجيش الثورة؟ فوجدت ناس بتقول اصل مبارك اصدر اوامر للجيش بفتح النار علي المتظاهرين بس الجيش رفض ولما حبيت اتأكد شفت المشير لما كان في اكاديمية الشرطة والكلمة اللي قالها،فقلت إذن:-
"الجيش والشعب ايد واحدة"
ولما الجيش مد حالة الطوارئ بمزاجه و مش راضي يطبق قانون الغدر وبيفاصل معانا في قانون الانتخابات عشان ميكسرش بخاطر الفلول،عملت عبيط وقلت:-
"الجيش والشعب ايد واحدة"
ولما اعرف ان المشير قال في شهادته ان مبارك لم يصدر اوامر للجيش باطلاق النار وان الكلمة اللي قالها في اكاديمية الشرطة كانت للتاريخ (كلمة قبيحة) وان طنطاوي اختار صاحبه الانتيم وتخلي عن الشعب المصري "وقولت في عقل بالي الله اومال ازاي الجيش حمي الثورة" الا اني غمضت عيني ورجعت وقلت:-
"الجيش والشعب ايد واحدة"
بس لما اشوف المشير بعد شهادته المخيبة للامال نازل في زيارة مريبة و"مفقوسة" وسط البلد "بالبدلة" والتليفزيون المصري بيقول انها كانت علي فجأة "علي اساس ان مذيع التليفزيون كان بيشتري شوية فانلات من وسط البلد" والناس بتسلم علي المشير ومكنش ناقص غير انه يخش محل ابو نسمة للملابس المستوردة يشرب معاه شاي ساعتها بقي قلت لأ وصرخت باعلي صوت وقلت:-
"يسقط يسقط حكم العسكر"
------------------------------------------------------------------------
التعليقات
أحمد إبراهيم
الإثنين, 03 أكتوبر 2011 - 03:16 am
والشعب كله مع هذه الكلمة
يسقط يسقط حكم العسكر يسقط يسقط حكم العسكر يسقط يسقط حكم العسكر يسقط يسقط حكم العسكر