غضب بالبحيرة بسبب نقص الزيت التموينى

سادت حالة من الغضب بين مواطنى محافظة البحيرة، بسبب عدم توافر بعض السلع التموينية لدى البدالين التموينيين، خاصة الزيت مما اضطرهم لصرف حصصهم التموينية دون الحصول عليه.
وقالت منى .ن:" ده تالت شهر على التوالي أروح و أصرف التموين من غير زيت و المتعهد يقولي خدي حاجة تانية مكانه علشان مفيش، طيب لغاية إمتى هيفضل الحال ده والزيت في السوق غالي".
وقال راغب: " حد يفهم الناس دي إن البيوت ما ينفعش تستغنى عن الزيت بسلعة تانية، يعني هنقلي البطاطس بصلصة مثلا".
وقال "س.ع" بدال تمويني: "الناس زعلانة مننا ومفيش حاجة بإيدينا إلي بيجيلنا بنصرفه و مش بنخبي حاجة عن الناس، ما وصلناش زيت وبنقول للناس ياخدوا حاجة تانية مكانه فيه إلي بيرضى وفيه إلي بيمشي وميرضاش يصرف من غير الزيت".
قال "محسن.س":" فوجئت بحذف شقيقي من البطاقة رغم أنه موجود بالبلاد ولم يغادرها ولا أعرف السبب وراء ذلك".
وقالت "زكية .خ" " البطاقة متسجل عليها 6 أفراد النهاردة رحت أصرف عطوني 5 أفراد بس وكلنا موجودين محدش سافر و لا مات الحمد لله".
قال وكيل وزارة التموين: "فيما يتعلق بحذف بعض الأفراد من علي البطاقات التموينية بأنه يجري حاليا تنقية البيانات لمنظومة صرف السلع التموينية لضمان وصول الدعم لمستحقيه، وعلي كل صاحب بطاقة تم حذف احد أفراد بطاقته بالخطأ التوجه للمكتب التابع له ومعه صورة ضوئية من الرقم القومى الخاص بالفرد المحذوف ليتم إضافته".