وصفات للتنظيف من "الموجود" فى منزلك

توفيرا للنفقات، ومن غير تعب وبحث؛ إليك وصفات للتنظيف المنزلى من أشياء موجودة فى كل بيت :
صابون مزيل للدهون الصعبة من الأواني :
ملعقة صابون غسيل أطباق + واحد كوب خل أبيض + واحد كوب ماء.
يخلطوا ويوضعوا في أي زجاجة فارغة عندك، وتغسلى به أى أوانى بها دهون.
*************
صابون للفرن والبقع المستعصية :
عدد 3 ليمون، يقطع ترانشات + 200 جرام ملح + قليل من الماء حوالي ثلث كوب.
التحضير :
نخلط ترانشات الليمون مع الماء في الخلاط جيدا مع نزع البذر من الليمون قبلها + الملح، ثم نرفع هذا الخليط على النار لمدة عشر دقائق ونضيف له نصف لتر ماء + 100 ملّ خل أبيض.
بعدما يبرد يعبأ في زجاجة فارغة، و ممكن إضافة أي زيت عطري للحصول على رائحة مميزة.
*************
بقع الشحم :
تفركي فيها بقطعة تباشير أبيض.
لحد ما تغطيها بكثافة وتتركيها قدر ساعة أو اتنين.
ثم تغسلي الجزء ده بصابون الملابس، بتاعك وتدعكي كويس.
*************
بقع الحبر :
أفضل طريقة عن تجربة، الحليب:
يعنى تنقعوا مكان البقعة فى شوية حليب لمدة ساعة وبعدين تتغسل شوية شوية.
*************
تنظيف الترسبات :
التي يسببها الصابون على حنفيات الدش في الاستحمام خل + ملح مباشرة على الليفة.
وكذلك السيراميك المحيط بالبانيو، وحوض الحمام أيضا، وساعات بكسل أخلط خلطة إزالة الدهون من الأواني.
فبحط في الطاسة شوية خل مع ملح وبفركها بالليفة وبتبقى بتبرق وتزيّق كمان من النظافة.
*************
لتلميع أوراق نباتات الزينة الطبيعية في المنزل :
قشر الموز من الداخل بعدما تأكلوا الموزة بالهنا والشفا تاخدوا القشرة وهي لسه طازة.
ويلمع بها النبات ماهي الميزة ؟
قشرة الموزة دي كلها ماغنسيوم وبوتاسيوم ومواد مهمة جدا لنمو وصحة النباتات.
وجربوها في تلميع الأحذية الجلدية والشنط الجلد بدل شراء الأسفنجة اللي بتلمع بس بتبوظ الجلد وادعولي؛ تلمعي الحذاء قبل الموز طبعا بقطعة من فانلة قطن الأول.
ثم بالقشر بتاع الموز ثم تتركيها قليلا وتلمعي بالفانلة تاني على خفيف.
************
صيانة الغسالات الأوتوماتيك والمحافظة عليها :
لازم على الأقل نعملها غسلة (فُم ) من غير هدوم خالص بس ماء وخل، حوالي 2 كوب خل؛ وذلك لتنظيف الحلة الاستانلس من ترسبات المياه والخراطيم.
ومحدش يقول الكلور بدل الخل؛ لأن الكلور بيهري الخراطيم الداخلية بتاعة الغسالة.