منى زكى تروى موقفا لوالدها يوم عقد قرانها وزفافها على أحمد حلمى

حلت النجمة منى زكى، ضيفة في برنامج "صاحبة السعادة" للإعلامية والفنانة إسعاد يونس، المذاع على قناة Dmc، وتحدثت منى زكى خلال الحلقة عن موقف والدها وقت كتب كتابها على أحمد حلمى وفى حفل زفافها.
وقالت منى: "أنا فاكرة يوم الفرح، خالتى جايه وراء بابا وبتقوله لما توصل لأحمد اديله منى عادى و يوم كتب الكتاب الجوازة كانت هتبوظ و بابا اختلق قصة عشان كل حاجة تبوظ زى عادل إمام في فيلم عريس من جهة أمنية و كلمت جدتى عشان تكلم بابا و يهدى الدنيا".
وتابعت:" بعد الزواج أنا كنت بشوف أحمد بيتعلم من بابا، وحماتى أنا من أول ما شوفتها و إحنا حبايب و بابا أحمد الله يرحمه كان زى العسل، وأنا مكنتش مقررة ولا أتجوز و لا أخلف بس جبت بنتى لى لى وأنا عندى 24 سنة وجبت ولادى وأنا عندى 40 سنة وأنا كبيرة طريقة التربية اتغيرت ودلوقتى عاوزه كل اللى أعمله أحبهم وأديهم حب واهتمام وأوقات ليها معنى، وبعاقبهم لما أخ يضرب أخوه، ولو ضربوا أختهم حتى بهزار يتعاقبوا وتربية الصبيان أصعب من البنات بكتير والعقاب أنى أخاصمهم، لكن مش بضرب خالص لأن عمرى ما اضربت في بيتنا واضربت مرة واحدة بس على حاجة ملهاش لازمة كنت راجعة من المدرسة وحاطة الجاكيت على وسطى والجو سقعة دى المرة الوحيدة اللى اضربت فيها".