ندى عبده الأولى مكرر علمى رياضة: ماكنتش بلزم نفسى بعدد ساعات محدد

استقبلت والدة الطالبة ندى عبده بدوى عبد القادر، بمدرسة حلمية الزيتون الثانوية بنات التابعة لإدارة عين شمس مكالمة مكتب الدكتور طارق شوقى وزير التربية والتعليم والتعليم الفنى لتبشيرها بحصول ابنتها على المركز الأول مكرر علمى رياضة فى الثانوية العامة على مستوى الجمهورية؛ فكانت فرحتها أكبر من تمكينها على تبليغ البشرى لابنتها التى سافرت إلى سوهاج منذ أيام، وتولى هذه المهمة زوج خالتها.
تقول الأم: ( فرحة كبيرة جدا الحقيقة، ندى بنت منظمة جدا وكل شئ عندها بحساب، بتذاكر من نفسها وعمرها ما احتاجت إنى أكلمها أو أوجهها فى موضوع المذاكرة ده، ربنا يحميها ويبارك فيها يارب، وأنا كمان ما كنتش بخليها تعمل حاجة ومفرغاها تماما بس للمذاكرة والنوم والدروس).
وتتحدث "ندى" عن سر تفوقها قائلة: ( تنظيم الوقت وفقا للأوليات هو أهم حاجة، ماكنتش بلزم نفسى بعدد ساعات محدد أو نظام ثابت جامد، كنت بنظم مذاكرتى على الأهم فالمهم وبوفق بين امتحانات الدروس إللى باخدها).
وبسؤالها عن الحضور بالمدرسة وعدد المواد التى تلقت فيها الدروس الخصوصية على مدار العام، قالت: ( ما كناش بنحضر فى المدرسة أساسا وكنت باخد دروس فى كل المواد طبعا).
وعن الكلية التى تتمنى دخولها قالت: ( لحد دلوقتى أنا مترددة ومحتاجة أعرف معلومات أكتر عن الكليات عشان أقدر أختار صح، لكن بشكل مبدئى ناوية أدخل هندسة قسم عمارة إن شاء الله.. لأن الرياضيات هى مادتى المفضلة).
أما النصيحة التى تقدمها ندى لزملائها المقبلين على الثانوية العامة العام الجديد فتقول: ( أنصحهم ما يسمعوش كلام حد من الطلبة إللى بيصدروا دايما صورة مبالغ فيها ويحسسوهم إنهم مقصرين وإن المدرسين إللى معاهم أحسن من المدرس إللى معاك؛ لأن ده بيحبط وبيوتر، وطبيعى إنهم هيحسوا بالملل مع طول فترة الدراسة والمراجعات على مدار السنة وتواجههم بعض الصعوبات فى المناهج كل ده طبيعى وبيعدى).