خالد الجندي يكشف تمثيلية حلقة «الجن» لريهام سعيد ب«فيديو صادم»

استنكر الداعية الإسلامي خالد الجندي، ما أذاعته الإعلامية ريهام سعيد في قصة فتيات طنطا الممسوسين، بأن الماء المغلي يسبب خروج الجن في الحمام.
وأضاف «الجندي»، خلال برنامج «نسمات الروح» بقناة «الحياة»، الجمعة: «لو مدلقناش مية سخنه في الحمامات هنلاقي المواسير اتسدت وهتجيب السباك ياخد 500 جنية منك».
وتابع: «المية السخنه ملهاش علاقه بالعفريت، بس ال500 جنية هيخلوك يبقي عليك 100 عفريت»، مؤكدًا أن العرب لهم قصص كثيرة مع الجن، مشيرًا إلى أن الرسول صلى الله عليه وسلم أوصى بالاستعاذة بالله من الشيطان قبل دخول الخلاء.
وشدد على أن وصية الرسول بالاستعاذة من الشيطان ليس معناها إنه جزم بأن الحمام به شياطين، وتوصيته بأن نقول: «أعوذ بالله من الخبث والخبائث» عند دخول الخلاء، ليست للاستعاذة من الشيطان الرجيم بعينه، ولكن الكلمة تتضمن جميع الأضرار التي قد تحيط بالإنسان.
وأكد «الجندي» أن الأنواع الجديدة من الحمامات ليست نجسة، موضحًا أنه لا أصل لما يردده البعض بالمس بالجن عند سكب الماء المغلي أو الزيت داخل الحمامات، متابعًا: «لكن مش كل واحدة بتطبل تجيب واحد دجال وتقولي عليه معالج بالقرآن، وأشهر واحد من الدجالين دول كان عضو في الحزب الوطني، ووراه مذيعة -يقصد ريهام سعيد- بتطبل وهو بيغني، هؤلاء يلعبون بالبسطاء، عشان يأكلوا عيش من وراهم».
واستكمل: «كل ده تمثيل وقرع ودجل وحسبي الله ونعم الوكيل»، ودلل الجندي على صحة حديثه بمقطع فيديو يكشف كذب الدجالين وحقيقة استخدامهم مادة الصوديوم في افتعال دخان لإيهام الناس بقيامهم بحرق الجن.
وقال «الجندي» في تعليقه على الفيديو «كل اللي بتشوفوه قرع وتمثيل ودجل ونصب واحتيال وشعوذة ولا أساس له، ولكن للأسف الشديد قبل ما ربنا بيخلق النصاب بيخلق له 40 مغفلا يصدقوه، أمال النصاب يعيش منين».
وهاجم «الجندي»، برنامج «صبايا الخير» لريهام سعيد، قائلًا: «الصبايا الخمسة الغلابة اللي اتفضحوا علشان سبق إعلامي، ودخلوا عليهم شباب الحتة وقعدوا يمسكوا في دي وفي دي، واتورطوا في تمثيلية لأسباب ما تعرفهاش».
وواصل: «كل اللى بتعملوه تمثيل وقرع ودجل وحسبي الله ونعم الوكيل فيكو، ومش هنسيبكم يا دجالين لحد ما نوعي الناس، الكارثة الكبيرة إنه يعمل جو رعب وغلامى ويخوف الناس، وكله نصب في نصب وأونطة».