ننشر نص التحقيقات مع "نهى العمروسى" فى قضية تعاطى المخدرات

نص أقوال الفنانة نهى العمروسى فى تحقيقات النيابة العامة معها، لاتهامها بتعاطى المخدرات، وذلك عقب إلقاء القبض عليها فى جاليرى «جنوب» بمنطقة الزمالك، رفقة المخرج عمرو فاروق، و9 متهمين آخرين.
وأمرت النيابة بعرض المتهمين على الطب الشرعى لبيان تعاطى المواد المخدرة من عدمه، ووجهت النيابة لهم عددًا من التهم، منها تعاطى المواد المخدرة وحيازتها، وإدارة مكان لبيع وترويج المخدرات، كما حبستهم 15 يومًا على ذمة التحقيق.
س: ما قولك فى ما هو منسوب إليك أنك متهمة بحيازة وإحراز مواد مخدرة كوكايين وحشيش وبانجو وذلك بقصد التعاطى؟
ج: محصلش.
ملحوظة: طلبت المتهمة الحاضرة إجراء تحليل لها بمصلحة الطب الشرعى لإثبات صحة أقوالها بعدم تعاطيها المواد المخدرة.
س: ما الذى حدث؟ وما هى ظروف وصولك أمامنا؟
ج: اللى حصل إنى بحب اشترى الأنتيكات والإكسسوارات الفضة القديمة والأحجار الكريمة، وأعرف عمرو فاروق من زمان، وكنا زمان فى معهد السينما، وأعرف إنه فنان وعنده جاليرى فى الزمالك بيبيع فيه فضيات وإكسسوارات وملابس فلكلور، ومتعودة أروحله عشان اشترى من عنده أى حاجة تعجبنى، إمبارح بالليل أنا رحت له حوالى الساعة 10 بالليل، وكان معايا صديقاتى راما زكريا، ومريم الشبوكشى، ودخلنا الجاليرى وكان مفتوح عادى، وبدأنا نتفرج على التحف، وطلعت الدور اللى فوق فى المحل، وبعدها بحوالى نص ساعة لقيت صوت زعيق وحركة مش طبيعية فى الدور الأرضى، ولقيت ناس طلعت لنا فوق الطابق التانى، وكان معاهم مسدسات، وكانوا بيضربوا عمرو جامد جدًا، افتكرتهم بلطجية فى الأول وبعدين فهمت أنهم بوليس، سألتهم ليه بتتضربوا عمرو، وبعدين لما عرفونى وعرفوا إنى مشهورة فهديوا شويه، وقلت لهم فتشونى، وأخدوا شنطتى والبالطو اللى مسكاه فى إيدى وفتشوهم ومالقوش حاجة، وعرضت عليهم لو فى واحدة ست تيجى تفتشنى بس هما ماكنش معاهم ستات، ومفتشونيش تانى، وبدأ الظباط يقولوا اللى معاه حاجة يطلعها، ومكنش معانا حاجة، وقلت لهم أنا مش بشرب سجاير أصلاً، وبعدين فتشوا المكان كله والناس اللى واقفة ومالقوش أى حاجة، وبعدين فضلوا ماسكينا جوه الجاليرى وأخدوا عمرو لوحده، وراحو به بيته القريب من مكان الجاليرى ورجعوا تانى، وسألت عمرو هما لقوا حاجة عندك قال: لا، وبعدين راحوا واخدينا كلنا على القسم، وهناك قعدوا يشموا نفس كل واحد فينا، فلقوا خمسة منهم شكوا فيهم وأخدوهم المستشفى يحللوا لهم.
س: متى وأين حدث ذلك؟
ج: الكلام ده حصل يوم 22/3/2014 حوالى الساعة 10.30 بالليل فى الجاليرى بتاع عمرو فاروق فى الزمالك.
س: من كان يرافقك آنذاك؟
ج: كان معايا صديقاتى مريم الشبوكشى، وراما زكريا، وشهرتها إنجى، وعمرو صاحب الجاليرى موجود وكان فى ناس تانية بتشترى وتتفرج، بس أنا معرفهمش.
س: وما سبب مناسبة تواجدتكم فى المكان سالف الذكر؟
ج: أنا كنت رايحة أنا ومريم وراما عشان نتفرج على الأنتيكات والإكسسوارات.
س: ملك من هذا المحل الجاليرى المسمى «جنوب»؟
ج: عمرو فاروق مأجر المحل ده تقريبًا.
س: وما هى طبيعة المكان؟
ج: عبارة عن محل تحف وأنتيكات، وله باب على الشارع زجاج بيتفتح وبيتقفل بنظام الدفع، وفى الدور اللى تحت فضيات قديمة، والدور التانى ده على مستويين الأول منهم أنتيكات والمستوى التانى ملابس فلكلورية وأنتيكات، وعمرو بيشتغل فى الحاجات دى وبيبعها فى المكان ده.
س: هل أنت معتادة على التردد على هذا المكان؟
ج: بروح هناك على فترات متباعدة.
س: من الذى قام بضبطكم تحديدًا؟
ج: هم مجموعة لابسين ملكى، وكنت فكراهم بلطجية وطلعوا شرطة.
س: وأين قاموا بضبطكم؟
ج: داخل الجاليرى بتاع عمرو.
س: وما الحالة التى كنت عليها أثناء الضبط؟
ج: أنا كنت واقفة بتفرج على الأنتيكات.
س: ما سبب قيامهم بضبطك؟
ج: معرفش.. هما قبضوا عليا عشان لقونى فى المكان.
س: وما هى الحالة التى كان عليها باقى المتهمين المضبوطين معك وقت وصول الشرطة؟
ج: هما كانوا متوزعين فى المكان، وكانت مريم وراما موجودين معايا بيتفرجوا على التحف، وهما كانوا متوزعين ومعرفش كانوا بيعملوا إيه، بس الكل اتمسك جوه الجاليرى، بس مش فى نفس الطابق.
س: كيف دخلت قوات الشرطة إلى داخل الجاليرى؟
ج: معرفش دخلوا إزاى، لأنى كنت داخل الطابق العلوى من الجاليرى.
س: ما الذى حدث عن دخول قوات الشرطة؟
ج: أنا لقيتهم طالعين فوق وماسكين عمرو بيضربوه وشدو شعره، وملمومين حواليه وماشفتش الضرب فين بالظبط.
س: وهل تم تفتيش المتهم عمرو فاروق قدامك؟
ج: أيوه فتشوه وملقوش حاجة معاه.
س: هل تم تفتيشك؟
ج: هما فتشوا الشنطة بتاعتى، وكنت ماسكه البالطو بتاعى برضه فتشوه.
ملحوظة: قدمت لنا وأطلعتنا المتهمة على صورة فضية اللون أخرجتها من حقيبة يدها قررت أنها قامت بشرائها من محل الجاليرى قبل وصول الشرطة.
س: هل تم تفتيش باقى المتهمين أمامك؟
ج: أيوه فتشوهم ومالقوش حاجة معاهم.
س: هل تم تفتيش المحل مكان الواقعة؟
ج: أيوه مالقوش فيه حاجة.
س: ما هى علاقتك بالنقيب إسلام عبدالعال؟
ج: معرفهوش، ولا تربطنى بيه أى علاقة، ولا حتى أى خلافات.
س: ما قولك فيما أثبته بمحضره أن تحرياته أكدت قيام المتهم عمرو فاروق بالاتجار فى المواد المخدرة مستغلاً محله المسمى «جنوب» للترويج لتجارته ؟
ج: الكلام ده غير صحيح.
س: ما قولك فيما أثبته بمحضره أنه بالانتقال لمكان الواقعة قام المتهم عمرو فاروق بمحاولة التعدى عليه وعلى القوة المرافقة؟
ج: محلصش.. اللى شفته إن الشرطة هيا اللى ضربته وشدته من شعره.
س: ما قولك فيما أضافه أنه بتفتيش المتهم عثر معه على كيس بداخله نبات البانجو المخدر؟
ج: أنا مشفتش حاجة زى كده خالص.
س: وما قولك فيما أضافه أنه بالوصول لمكان الواقعة تم القبض عليك وباقى المتهمين بداخله حال تعاطيكم المواد المخدرة؟
ج: محصلش.
س: ما قولك فيما أضافه أنه عثر فى مكان الواقعة على أنبوب بلاستيك عليه آثار مادة مخدرة، وورقة نقدية فئة 100 دولار بها آثار مادة مخدرة، وأوراق تستخدم فى التعاطى، وزجاجات خمور وسجارتين ملفوفتين لجوهر الحشيش، وزجاجة شفافة بها سائل أصفر معلقة تستخدم فى تعاطى الكوكايين، وزجاجة بلاستيكية سوداء بها تبغ أخضر؟
ج: أنا معرفش حاجة عن الحاجات دى وما شفتهاش قبل كده، أنا مشفتش غير زجاجات فاضية كان عمرو راكنها على جنب جوه الجاليرى.
س: وما قولك فيما أثبته أنه عثر مع المتهم كريم جمال محمود على قطعة لجوهر الحشيش المخدر؟
ج: أنا معرفش حد اسمه كريم، ومشفتش حد من المقبوض عليهم كان معاه مواد مخدرة.
س: وبماذا تعللين ما جاء بمحضره؟
ج: هو عايز يلبسنى قضية وخلاص عشان ميطلعش دخلته على الفاضى.
ملحوظة: عرضنا على المتهمة الماثلة جميع الأحراز الواردة بالقضية، فأنكرت صلتها بها جميعًا.
س: ما قولك فيما تم عرضه عليك الآن؟
ج: أنا معرفش حاجة عن الحاجات دى خالص.
س: هل لديك سوابق؟
ج: لأ.
س: أنت متهمة بحيازة وإحراز مواد مخدرة، وكان ذلك كوكايين وحشيش وبانجو، وكان ذلك بقصد التعاطى فى غير الأحوال المصرح بها قانونًا؟
ج: محصلش.
س: هل لديك أقوال أخرى؟
ج: لأ.
ملحوظة: الحاضرون مع المتهمة طالبوا بإخلاء سبيلها بأى ضمان تراه النيابة العامة، تأسيسًا على بطلان القبض والتفتيش، وبطلان الاعتراف المنسوب للمتهمة بمحضر الشرطة، وعدم تناسق الدليل القوى مع الدليل المقدم كأحراز بادعاء تعاطى عشرة أفراد كيس بانجو، ودفع بعدم معقولية تصور حدوث الواقعة، وانتفاء مبررات الحبس الاحتياطى، وعدم وجود أى صلة بين المتهمة والأحراز المضبوطة، وعدم استكمال الأذونات الصادرة من النيابة، وخلوها من الأسباب، ودفع باصطناع محرر المحضر لحالة التلبس، وقيامه باستباق تقرير المعمل الكيماوى، وقيامه بدس ما زعم أنه مادة الكوكايين، وما زعم أنه مخدر البانجو، وكذلك قيامه باصطناع وتلفيق الاتهام بكامله لها، حيث اشتمل عدد زجاجات فارغة، وعدد 4 زجاجات مغلقة، ومن ثم طلب إخلاء سبيل المتهمة من سراى النيابة نظرًا لحالتها الصحية المتدهورة.