الدنيا عاملة ايه أبيات شعرية للشاعر محمد السنباطي

الدنيا عاملة ايه
عاملة علينا ستارة
ستارة لونها إيه سودة ولا فاقعة بمبي
ولا ما تفرق يا ابني
اللون عندي كحلي
كحلي ولا كحلك
عمري في سنين ما أبوحلك
من كتر همي جوه مش عارف أعمل أخوة
جوه قفل الأفواه من غير ترباس ولا قوة
أفواه القلوب عملت ثورة سمعت في المجرة
والشعب كان في جره وطلعوه لبره
بره السكوت والصمت بره السكون والهمس
ولا حد يخاف يموت وقالوها بأعلى صوت
ارحل بعيد عنا دم ابننا غالي
وهغني موالي دم ابننا غالي
وعمري ماهوالي بعد كده والي
والي همه الكلام ياكل بعدين ينام
ولا همه حتى بصة لشعبه لو في المنام
بصة يعني اهتمام بشعبه الغلبان
ويوم ما يكون تعبان
يجري علي الألمان
ويغنو عليها بكمان
ترجعلنا بسلامة يا ريس
وأهو كله علي كله يهيس
كان همه في جيبه يكنز ويقول لأمريكا تبرز
تبرز لنا ذل ومهانة ويصدر لنا الابتسامة
شعب صديق وحليف ما دام أعطانا البولبييف
والغاز يروحلو دوغري بس بدولار وربع
والشعب هنا ياخده من جوه بق سبع
أيوه أنا عاوز أقول
أيوه أنا نفسي أقول
بس مش قادر أقول
أقول إيه ولا إيه
خلوني ساكت يا ناس
وأقولك من الأساس
مش هفتح الكراس
كلمة أخيري لولدي
ولجدي ولوالدي
دم الشهيد روي أرضي
وبروحه صان عرضي
أوعوا تسيبوا تاره
من اللي قتلوه
وكتموا أسراره
في القبر ودوسوه
خلاص خلص الكلام
واللحن والموال
بس عندي سؤال
الدنيا عاملة إيه ،،،،،