مدونة طب والله فكرة : حكومة شرف : ناوية تفرض ضرائب على الشعب كله - طب ليه .؟

طب سؤال واحد
إشمعنى السجاير يعنى
مثلا لإن السجاير سلعة ترفيهية يستخدمها الطبقة العليا من الشعب فقط ؟؟؟؟
مثلا لإن الشركة الشرقية للدخان دى شركة يهودية وبتبيع منتجاتها لإسرائيل فلازم ناخد منها ضرائب عالية ؟؟؟؟
على أساس ان السجاير دى حاجة كخة طبعا واللى بيشربوها دول ناس وحشيين أخر حاجه وإن حكومة ما بعد الثورة عاوزة تنظف البلك من شوية المدخنين الزبالة دول ؟؟؟
هو فيه إيه ؟؟؟؟؟
هى الشركة الشرقية للدخان دى اصلا شركة تابعة للحكومة المصرية ،، يعنى الحكومة تعمل مصنع سجاير وتخلى الناس تدمن على تدخينها وبعدين تيجوا تقولوا اصل السجاير مضرة ووحشة وإحنا بنعمل كده علشان الناس تبطلها ،، لا معلشى يا حكومة إنتى السبب أساسا فى إدمان الناس للسجاير ومادمت إنتى السبب لازم تتحملى تبعيات الموضوع
طبعا الكلام غريب
طب ناخد مثال علشان نقرب وجهة النظر
مثلا فيه شقة عايش فيها شاب عازب لوحدة ،، وجيت أنا وخليت فى الشقة معاه بنت منحرفة مثلا ،، فيجى الشاب يزنى بيها ( والعياذ بالله ) فأجى انا وأحبسة علشان زنى
ده عقل مين اللى يقول كده
اللى أنا عاوز أقوله إن الحكومة هى اللى بتنتج المنتج وهى الوحيدة اللى بتنتجه ،، وهى عارف إن المنتج ده قابل لإن الناس تدمنة ،، فمتجيش بعد كده تدوس على زرار وتقول الناس تبطل أو انها تغلى سعر بصفتها الشركة الوحيدة المنتجة والمحتكرة للمنتج
لأنها لوعملت كده ( مكناش نعيب على أحمد عز أيام ما كان محتكر سوق الحدية )
وبعدين هو مين اللى بيشرب السجاير دى ؟؟ صفوة المجتمع ؟؟
مفيش بيت فى مصر إلا وفيه شخص مدخن ،، ورب أى أسرة بيعمل لما بيجى يقبض مرتبة بيحسب مصرف السجاير زى مصروف الاكل والشرب بالظبط ،، عملتوا صور مهببة على علب السجاير الناس بتشرب ،، لو جبتوا الشيطان وحطيتوه على علب السجاير برضة الناس بتشرب
لإنكم بمنتهى البساطة مش بتنتجوا لبان شكلس ، لا ، إنتوا بتنتجوا منتج قابل لأن الناس تدمنوا
وفى الاخر يعنى مترحوا تفرضوا ضرائب جدية على اصحاب الكباريهات والمطاعم الكبيرة وأصحاب الفنادة الخمس نجوم وشركات السياحة
خلاص خلصت الدنيا ومبقاش فيها الا المدخنين
كفاية كده