احتجاج على الفيس بوك لرفع أسعار السجائر

أثار خبر ارتفاع أسعار السجائر العديد من شباب الفيس بوك، وهو ما أنعكس في صورة العديد من الجروبات، حيث طالب أحد الجروبات بوقفة احتجاجية بسبب ارتفاع سعر السجاير.. قائلا: "كووكوو هتبقى ب 5 جنيه".
وانضم لهم جروب حركة "معا حتى آخر نفس" الحملة الشعبية للمطالبة بتخفيض أسعار السجاير، أما جروب "لا لرفع أسعار السجائر" فأشار أن ده خراب بيوت، ده الواحد بيشرب سجاير اكتر من المية.
ورأى أصحاب جروب "هبطل السجاير وهشرب الحشيش" أن أسعار السجائر تكاد تقترب من سعر الحشيش، بل يتفوق الحشيش عنها لأنه مفعوله مستمر وبيعمل دماغ مدة أطول.
كما أسس مجموعة من الشباب جروباً بعنوان "مش هننتخب ريس جديد إلا لما يرخصوا السجاير تانى" يقول مؤسس الجروب: حتى الحاجة اللى الناس بتشربها علشان تموت بسرعة بيغلوها عليهم، يعنى زهقت من حياتك بردو هتشترى الموت.
وفي جروب "معا ضد ارتفاع أسعار السجاير تحت إشراف قهوة خبينى" يقول مؤسس الجروب إحنا ممكن نسكت على أى حاجة تغلى إلا حاجة واحدة بس مش ممكن نسكت عليها هيّ السجاير.. تغلي؟؟ الحاجة الوحيدة اللى مصبرانا ع العيشة وأننا ننفخ فيها أرف اليوم وزهق النهار بقت أغلى من الخضار طب الحشيش غلا وقولنا ماشى البانجو شح من السوق وقولنا ماشى البودرة غليت قولنا ماشى بس السجاير لا لا لا.
ويضيف: سؤال يطرح نفسه ع الساحة: ما هى الوسائل الأخرى المتاحة لكى نشربها بدلا من السجاير؟؟
ويسخر قائلا: بلاغ هام تقدم واحد محترم إلي قسم الشرطة وفيه قد سرق منه شىء ثمين الثمن ويتعدى ثمنه 15 جنيهاُ وهى علبه مارلوبورو أحمر، لا أستغفر الله العظيم يا رب أبيض، وجارى البحث عنها من قبل رجال الشرطة ويتورط فى ذلك جميع.. الخرمنيين!!
وفى مقابل ذلك وجدها العديد من الجروبات الأخرى فرصة للامتناع عن التدخين مثل جروب يالا نبطل السجاير، وجروب يا جماعة لازم نبطل استهبال ونقاطع السجاير، مؤكدين أن أضرار التدخين لم تعد على الصحة فقط.