فلان: معلهش في السؤال هي القنوات الفضائية المصرية والجرائد والمجلات ومواقع الإنترنت بتوصل للدول العربية الشقيقة. علان: بتوصل وكلهم معانا دقة بدقة.. لكن ليه السؤال؟. فلان: يعني شايفين مصر بتلف حوالين نفسها وبتلاغي صندوق النقد الدولي عشان تاخد قرض تمشي أمورها.. ومحدش منهم قال لها إيه الحكاية؟. علان: كان الله في عونهم ومشاكلهم كتير واللي جاي علي قد اللي رايح.. وبعدين جايز محرجين يبعتوا فلوس لمصر! فلان: ومش محرجين لما بيصرفوا مليارات يمين وشمال وسلاح بالشيء الفلاني. علان: لأن أمريكا عامل لهم عفريت اسمه إيران وبعدين يا أخي همه أحرار في فلوسهم.. وبعدين فرصة. فلان: فرصة لمين؟. علان: لكل مصري أصيل معاه فلوس يعبر عن حبه للبلد بالفعل مش بالأغاني.. والبلد فيها مليونيرات بسم الله ما شاء الله ممكن يشتروا بلد من بابه تسليم مفتاح وفي النهاية ربنا ما يحوج مصر.. لا للغريب أو القريب!. ابن البلد