حجر في مقلاع

شِيح بيحضن في نعناع
نعومة زي ملمس الزبدة
خشونة بتاكل في الصباع
صبر ولا صبر المقهورين الغلابة
حب للرقص بيملكني
من القشرة للنخاع..
رقة وخشونة
مانجة ولمونة
صلابة وليونة
يا خلق حسُّونا
خيط دم
وبياض في الشراع ..
أنا حجر
وصفوه بالقسوة
رغم إنه أحنّ من البشر
وله نعوم . وحنيَّة . وحضن ياما ياما ساع
أنا حجر يرموه هنا
يخلُّوه دم
ونار
وضياع
ويتعمدوّا ينسوني
ويعاملوني معاملة حجر في مقلاع
يحسم هرتلة
ينهي نزاع
لاسألوه في مرَّة أنت حزين ليه؟
ولا بتحلم بأيه؟
ولا ناقصك أيه ؟
ولا ضهرك انحني من إيه؟
ولا ليه صوتك مكتوب عليه يضيع قبل السماع؟
أنا حجر في مقلاع
وماخور لامؤاخذة للجماع
ومركبة مخرومة وعرضة للضياع
يعوزوني .. يخلُّوني ملك
يكرهوني .. يعملوني زمبلك
وأراجوز يضحِّكهم
ويسعد الأتباع ..
أنا حجر في مقلاع
لا حد في يوم حسّ بيَّ
ولا حد في يوم
فكَّر يدفع لي حق انتفاع!!