ناس كومبيليزون..!!

آه مصدق..!!
إن فيه في الدنيا ناس
ممسوسه..
معجونه بجنون
ناس بِدّل وكرفتات
ناس فيزون
ناس فانله وكومبيليزون
التلج ناس
والفحش ناس
والعهر ناس
وممثلين آخر شياكه
عينيها تنطَّخ..
برصاص
ناس بتعجن كدبها
وبتخبزه..
وبتاكله ناس
ناس أونطه..
ناس في شنطه
بتشتريها ..
زي لمؤاخذه المداس..
ناس هوا..
منفوخه زي البالونات
أو هولام..
وز بيعوم في العتام
بيطظ من بُقه الكلام
ناس كده مناديل ورق
لنفَّه واحده..
وتفَّه واحده
بعدها تحضنها سلة
مهملات
آه من دي ناس
مهما تملا..
مكانها بحروف الكلام
تلقاه سكات /
تلقاه موات
ناس بلاها من دي ناس
قرود / حواه
أرجوزات
ماشيه بلاوي مسيحه
ع الأرض سيما
زي القديمه..
ما تسوي لوزه
ترقَّع الوش اللي مات
لو كنت عايز تحترمهم
رصهم قدام عينيك ..
نشن عليهم طخهم
أو حطهم بصابيص جحيم
فوق الحجر..
وقت ما يشعشع مزاجك
للشياشي والمعسل..
بالماشه تفعص أصلهم
انفخ بقي..
بعد شدة معلمه
تلقي الدخان مليان
بناس..
حبة فتات
أهل التناحه والبجاحه
والنباحه
عرايا جوه الفاترينات
غاوين سماجه
واعلانات
ريحتكوا زكمت
أنفنا..
ألاعيبكوا ما خالت لنا
ووجودكوا كارثه..
في وسطنا
نتوءات تشوَّه فرحنا
ملعون أبوه..
اللي ما يلعن..
سلسفين الهزل فيكو
ملعون أبوه..
إللي يجاري دماغ أبوكو
يا وش ملزوق في القفا
لو حنتفوه أو حففوه
كان وش ليله مدعمسه
يا مخرسه..
كل المعاني المخلصه
في وش الجمال
يا شر ناس