لما أشوفك شعر: سلوي محمود

مش حقولك أي حاجة لما أشوفك
مش راح أسأل حتي إيه كانت ظروفك
راح تلاقي قلبي دايب بين كفوفك
بش أشوفك.. أشوفك
مش راح أنصب جوه عيني محكمة
كل حاجة فيا ليك مستسلمة
مش حاقابلك ويابركان أسئلة متبدلة. متحللة
ياحبيبي مش ح تبقي مشكلة
مش حاقولك أد إيه مستحمله
متحملة البعد وعذابك
ومكملة المشوار لبابك لاجل شوفك
مش راح ألمس حتي إيدك بالحنان
مش حاخلي شوقي في عيوني يبان
مش راح أسأل في الزمان ولا المكان
بش أشوفك
مش حاطفي نار حنيني أو حنينك
بس المح شمس طالة لحبنا من فوق جبينك
مش حاقولك أد إيه فاتت ليالي
من غير ما أحس بطبطبة
من إيد عليا قريبة
ولا أد إيه مستغربة
متغربة
والغربة مرة
مش حاتلمح جوه في عيوني العذاب
واللا دمعة حايرة نازلة في سكتك بتدق باب
ولا قلبي داب م الاغتراب
ولا أي كلمة نحس بيها بلوم عتاب
بس أشوفك
راح تلاقي قلبي دايب
بين كفوفك
بس ألمح هيئتك إنشاء الله طيفك
بس أشوفك