زمِّليني

زمليني زمليني
توبك الفرحان. ماليني
في الفدادين. مرمغيني
جنب زهره في حوش قديم
اذكريني
حوشي عني الحدايات
احرسي كتاكيتي
من بطش المخالب
دمري وكر الثعالب
سمعيني الأغنيات
من مقامات. النايات
حوشي عني.
كل اصوات الأعادي
انقذيني من الرمادي
ومن الجراح.
ومن الغرق
ستي بتنادي كتاكيت الجنينه. في الشفق
امي نازله البحر.
طالعه من الدهب. والقمح
بيغني ف سكات
الهداهد لونها هادي
في الجنينه. ستي. بتنادي
ترد عليها. قنايات من فرح
الزهور. رافعه الأيادي
جنب منها. العصفورين
ام جناحات
امي ع البحر. بتغسل. في الشموس
الإغنيات
ياسلام. ريحة موغات
يا سلام ريحة. امان
والعروسه. جايه من آخر الريحان
فوق جسور من مشايات
فوق عبير البرتقان
في خدودها. الغمازات
شايله. ماورد وحاجات
والصاجات ع العيد.
بتفتح لي البيبان
والشبابيك. الحان. من النور مفتوحين
ضي بيحاول يبان
الإيشاربات اطلسي
اقلعي الشال. وارقصي
ما تخافيش
الخفافيش. روّحت
النغم ِ. سري - بيطلع من خفوت
العصافير. عماله تقفز
الإيقاع. باقي ومش عايز يموت
وابتدي الفجر الجميل
ينبلج - لا ينبلج
والطيور. رايح تحج
- الأدان في كل فج
بينادي الآدان
البراعم حلوه. زي الإبتسام
ياسلام
طارحه. في عز الظهيره
ميت زهيره
فوق فروع البرتقان
والهداهد. منتشيه
ماشيه كالغيد الملاح
قايمه تهمس. لاجل ما تشوف الصباح
والنهار عمال. يوشوش في الجرار
شلالات من ضي في البيت القديم
الشجر يقلع ورق في الفجر
- وينادي النهار
للتراتيل البعيده
اما انا ماشي - علي الطرقات
. باغني
سامع الزغاريد سعيده
مش سعيده
قبل ساعه كنت. باتاوب
وبانعس
والبنات بتمد ايدها
تمسك السباطات. من النخله الوليده
ياسلام علي لون جريدها
رشوا نور العطر. رشوا.
ما تخافوش يابنات. وخشوا
رشوا ريحه ع الشجر
رشوا رشوا
خشوا قلبي ماتخافوش
مش ها تلقوا غير. قرنفل
زهر من بساتين. وفل
وحاجات. طايره.
بدون جناحات. وبتحاول تطير
حاولوا لو مره تصاحبوا البنزهير
مش هاتلقوا. الا زهر ابيض كتير
وحاجات بيضا. بتضحك للأمل
مليانه خير