بتخاف من مين؟!

بتخاف من مين
وانت اللي الخوف
بيخاف منك
وبيعمل لك ميت ألف حساب
والموت بيموت.. لما يشوفك
يتطبطب علي دمعة عينك
ويتبقي سحاب..
بيضلل ع الناس التايهة
تديهم مفتاح الشقة
وانت الأبواب
وتخاف ازاي؟!
بتغمض عينك وتفتح
علي صوت كرباجك
بيلسوع ضهر الدنيا
وبيعزف ناي
ولا همك إيه رايح منك
ولا إيه الجاي
بتخاف من مين؟!
وانت الشبعان من لبن الشمس
وأبوك الريح
أنت الأنهار والحرية وانت الميادين
من غير قضبان قطرك ماشي
في طريقه بيبوس قدم الخطوة
والناس شاهدين
إنك هادم لبيوت الخوف
وإنك معروف وإنك فارس
وإنك حارس لبلاد المجد
وإنك فيضان النيل والسد
وتخاف من حد.. تخاف ازاي؟!
وانت الأشجار اللي بتطرح وتشع نهار
وانت الأزهار اللي شذاها
ديما يسرح عكس التيار ازاي تنهار
وتخلي الغربان فيك تشمت
اجمد واثبت واجه خوفك
وإياك تهرب من الأقدار