ولإني تعبت قوي في الدنيا وشفت كتير من ناسها رافض افتح قلبي لغيرك دا لأنك عيني وأصل الصورة رغم الحزن الساكن فيّه لسّاكي معايا صبورة ولأن نهارك ساحب ليلي لجل يشقشق فجر جديد صوت الديك عمّال يأدن يبدر حب علي العناقيد بيطرح فل. جناين ورد.. علي العاشقين حُبك غنيوه شوق فارده جناحها علي المحتاج حُبك ضل ف شمس الصيف حُبك تاج.. علي راس الكل حبك مرسي ف وقت التوهة جامع كل حبيب وخل حبك زيّ سنين يوسف قبل عجاف الأرض حبك فرض نجاة للروح حبك ضيّ سفينة نوح دقات تهدي القلب حياة حبك آية عشق.. صلاه رغم الصعب. ورغم الغلب ورغم الليل.. بحس براحة كبيرة معاكي لما بشوف الضحكة ف وشك راسمة طريق مليان قناديل حتي بيبان الخوف جوّايا تفتح علي همسة.. قول يا ضنايا يرتعش القلب ويبكي القي ايديكي تمسح لي بُكايا بين أحضانك بانسي العالم أنسي عذابي. أنسي أسايا وبين شفتينك تجري آيه بتطمّن كل سنيني الجاية ولاني تعبت قوي م الدنيا مالقتشي غير قلبك وطني.. يا امّايا مجدي عبدالرحيم