بالفيديو.."خناقة" بين كابتن "زيزو" ورئيس الزمالك

دخل الكابتن عبدالعزيز عبدالشافي (زيزو )، لاعب الأهلي السابق ومدير قطاع الناشئين بالنادي، في مشادة كلامية مع رئيس نادي الزمالك ، بعد أن اتهم الأهلي بجلب «15 ألف عيل يشتموا جيش مصر».
وقاطع «عبدالشافي»، الذي حل ضيفًا في استوديو برنامج «ممكن» مع الإعلامي خيري رمضان، وفي حضور وزير الشباب، خالد عبدالعزيز، مداخلة رئيس الزمالك قائلًا: «محدش شتم جيش مصر يا سيادة المستشار، النادي الأهلي نادي الوطنية، مفيش حد في النادي الأهلي يشتم جيش مصر، حضرتك شتمت مصر كلها السنة اللي فاتت وشتمت النادي الأهلي كله، وشتمت رموز النادي الأهلي، لا يا راجل أنت محتاج لمصر كلها، محتاج تعتذر لأمهات مصر».

وفيما حاول مقاطعته قائلًا: «أنت تقعد تحترم نفسك»، لم يعطه «عبدالشافي» الفرصة واستمر في توجيه حديثه لرئيس الزمالك: «محتاج تعتذر للناس اللي أنت سخرت من خلقة ربنا فيهم، محتاج تعتذر لنادي الزمالك، ولكرسي نادي الزمالك، كرسي نادي الزمالك ده كرسي محترم، من أيام حلمي زامورا وأبورجيلة».

ورد رئيس الزمالك مجددًا قائلًا: «اتكلم بأدب»، ليرد «عبدالشافي»: «أنت يا راجل محتاج تعتذر لنفسك، عارف يعني إيه تعتذر لنفسك، عشان يبقى عندك شوية سلام تقدر تعامل بها الناس بأخلاق كريمة».

ورد الأول مجددًا: «أنا محترم غصبًا عنك»، ليرد مرة أخرى «عبدالشافي»: «محترم إيه ده أنت شتمت مصر كلها، يا راجل اتقي الله، أنت مش بتتكلم على التسجيلات؟ بص على التسجيلات بتاعتك شوف السب والقذف».

وحاول خيري رمضان التدخل لإنهاء المشادة قائلًا: «كابتن عبدالعزيز أنا عمر ما حصل خناقة في برنامجي»، فرد «زيزو»: «دي مش خناقة، هي دي المشكلة الأساسية، المشكلة الأساسية في هذا الرجل إن هو بيتطاول على أي حد في مصر وعايز كل مصر تعتذر له، ازاي؟».
شاهد الفيديو: