(إفطار بطعم العامية).. يوم رمضان المجنون!

رمضان من أجمل شهور السنة إللى كلنا بنستناه شهر الخير والرحمة وكمان البركة.. لا ثانية كدة "بركة" مين؟! إللى ما شفتها من أول يوم فى الشهر أنا أقصد " بركة الوقت طبعا " دا أنا بصحى من النوم ألاقى اليوم خلص، الواحدة مننا تفضل يا عينى واقفه فى المطبخ طووول اليوم على رجلها بتحضر "المشمر و المحمر" وأكيد مش هننسى الحلو دا غير المشروبات إللى مش بتخلص ويادوب تقول الحمد لله خلصت ألحق ارتاح شوية وأقرألى كام جزء فى القرآن الكريم تلاقى المغرب بيأذن، وهوب جرى على المطبخ تانى ألحق احضر السفرة دا احنا طول اليوم صايمين ومش قادرين ..السفرة جهزت طيب أكلنا وكمان حلينا الحمد لله ألحق أظبط المطبخ وأغسل "المواعين" إللى مش بتخلص بس هتخلّص عليا .. كتير أدخل المطبخ أقف قدام الحوض وأكلم المواعين "إنتى بتعملى فيا كدا ليه، أنا عملت فيكى حاجة؟، ولا علشان بحطك على النار " يارب المواعين تموت أو تتشل .. يلا أدينى خلصت المواعين وظبط المطبخ والدنيا تمام ألحق تانى أقرأ القرآن إللى ملحقتش أقرأه قبل الفطار.. إيه دا الساعة بقت 12 لا السحور يارب صبرنى كلاكيت ثالث مرة، جرى على المطبخ أحضر السحور .. أدينا اتسحرنا ودخلت على المواعين تانى فجأة الفجر بيأذن .. ليه ها ليه فين بقيت اليوم .. لسة فى حاجات كتير مخلصتهاش وفجأه ألاقى "عم حزومبل ..بصوت خفى بيقولى .. اليوم خلص اليوم خلص " بركة اليوم قلت ولا أنا إللى بضيع وقتى ؟!! طيب الناس كلها زيى ولا أنا بس ؟! دماغى خلاص مش قادرة .. بس انا خلااااص قررت أنظم يومى مش لازم أعمل 100 صنف كفاية 2 أو 3 و الحلويات خليها يوم واحد فى الأسبوع علشان الدايت برضه، يارب باركلنا فى الوقت وخصوصا أوقات رمضان إللى جريت بسرررعة وصلت نص الشهر الكريم والله أكرم.