نشطاء "الفيس بوك" يسخرون من الواقع المصري: "أنا رايح فين أنا راجع تاني"

أصبح الواقع غريبًا لدى الشباب حتى وصل بهم الحال أن اعتبروا أن تحليلاتهم السياسية أصبحت تخترق الواقع ليصبح لسان حال كل المصريين بعد ثورة 25 يناير: "إحنا إللى غلبنا الواقع"!
وبالإثبات مواقع التواصل الاجتماعي أصبحت تدوينات الشباب عبر نوافذ "الحرية" بوصف المشهد السياسي المصري بسخرية كبيرة، مما تصل إلى مشهد عادل إمام عندما قال "إزاي أجدع"!
ومنها أحد النشطاء على موقع التواصل الاجتماعي "فيس بوك" نشر على صفحته، أمس، حوارًا دار بينه وبين أحد أصدقائه في سخرية عما يحدث في مصر الآن.
حيث دار الحوار عن أن صديقه يريد معرفة ما يحدث في مصر ليرد قائلًا: "لو شرحتلك الوضع مش هتفهم أي حاجة برضو.."، وأصر صديقه على معرفة ما يحدث فلم يتردد وشرح له ال"حدوتة المصرية" كالآتي: "برضو.. ماشى يا سيدى مادام مصر شوف.. إحنا هنا في مصر بقينا منقسمين ل4 طوائف تقريبًا.. إخوان - سلفيين - فلول – ثوار".
واستطرد: "الإخوان والثوار ضد الفلول... والثوار والفلول ضد الإخوان !... والإخوان والفلول ضد الثوار !"، ليتساءل صديقه "اللي تاه زيادة": "_طب والسلفيين؟"، ليرد قائلًا: "مع الكل وضد الكل..".
فيما كان رده كالآتي: "أه.. ده انتم مجانين بقى ! هو إيه اللى حصل لكم بالظبط احكيلى القصة من الأول عشان أفهم"... مهما فعلت فالواقع نفسه "اتجنن" بسبب شعبنا العظيم.
والحكاية ببساطة "بص يا عم يوم 25 يناير 2011 الناس كان فاض بيها من الفساد والقمع والاستبداد و.... و..... فنزلوا الشارع وفضلوا معتصمين 18 يوم عشان مبارك يمشى..
_ عظيم ! يعنى ثورة شعبية..
الثوار والإخوان قالوا كدا..
_ والفلول؟
قالوا مؤامرة خارجية..
_والسلفيين؟
قالوا الخروج على الحاكم حرام ولازم نطبق الشريعة !
_ تمام.. وبعدين؟؟
بعد كدة مبارك تنحى عن الحكم والجيش أعلن أنه مسك الحكم بقيادة المشير طنطاوى اللى هو وزير دفاع مبارك..
_ انقلاب عسكرى يعنى؟!
الثوار قالوا كدة.. وفضلوا يهتفوا يسقط حكم العسكر
_ والفلول؟
قالوا الجيش حمى الثورة! واللى بيقولوا يسقط حكم العسكر خونة ومأجورين!
_ ههههههههههههههههه مش كانت مؤامرة! طيب الإخوان قالوا إيه؟
قالوا نفس الكلام.
_ والسلفيين؟
قالوا ثورة.. ولازم نطبق الشريعة!
_ إيه الهبل ده!! يعنى طنطاوي هو اللى ماسك الحكم بعد الثورة؟!!
لأ.. هو فضل ماسك سنة ونص وبعد ضغط الثوار راح مسلم السلطة للإخوان بقيادة محمد مرسي!
_ آآآآه... وصلت.. يا ولاد اللعيبة! يعنى محمد مرسي بتاع الإخوان اللى ماسك دلوقت؟
لأ..
_ إيه اللى حصل تانى
فضل يكفر في الناس وحبس الثوار وقتل منهم ناس والبلد بقت بترقص على الحبل وهو عمال يقول كلام غريب.. راح الثوار والناس والفلول نزلوا الشارع وفضلوا 3 أيام و.....
_ ثورة تانى يعنى! والإخوان قالوا إيه؟
قالوا الجيش معاهم وهينزل يحمى الشرعية!
_ ههههههههههههه والفلول؟
قالوا ثورة شعبية..
والثوار؟
نفس الكلام !
طب والسلفيين؟
قالوا الخروج على الحاكم حرام ولازم نطبق الشريعة!
كمل.. ها وإيه اللى حصل بعد ال3 أيام؟
الجيش شال مرسي وجاب واحد صورة كدة بس بقى هو اللى بيدير البلد..
_ انقلاب تانى؟!!!
الإخوان قالوا كدة.. وفضلوا يهتفوا يسقط حكم العسكر!
_ ههههههههههههه سبحان الله طب ما هو نفس سيناريو 11 فبراير!! الكلام اختلف ليه؟ طب والسلفيين؟؟
قالوا ثورة.. ولازم نطبق الشريعة !
_ طب والثوار؟
قالوا طلاسم وألغاز غريبة مفيش حد فهمها وبعدين فضلوا يتخانقوا مع بعض لحد دلوقت!
_ هههههههههههه جالهم صدمة عصبية وللا إيه؟!! وطبعا الفلول قالوا ثورة والجيش حماها واللى بيقول يسقط حكم العسكر خونة ومأجورين صح؟
إيه ده عرفت ازاى؟
_ ما أنا فهمت السيستم ماشى ازاى بقى وطبعا عملوا انتخابات وسلموا السلطة للفلول صح؟
لأ.. عملوا انتخابات واستلموها هما"
قائلا: "_ يا مثبت العقل والدين يارب !! طب والإخوان بيعملوا إيه دلوقت؟
بيقولوا يسقط حكم العسكر
_ آه !! طب والثوار؟
نفس الكلام.
_ والفلول؟
بيقولوا إن الإخوان خونة ومأجورين..
_ والثوار؟
بيقولوا نفس الكلام..
_نفس الكلام؟! طب والإخوان بيقولوا ايه على الثوار؟
بيقولوا انهم مع الفلول !
_ ايه العبط ده !! طب الفلول بيقولوا ايه عالثوار؟
بيقولوا إنهم مع الإخوان !!
_ ايه الجنان ده يا عم انت بتشتغلنى على فكرة !
والله زى ما بقوللك كدا !
_ امممم يعنى طنطاوى رجع مسك الحكم تانى.. ابن اللعيبة !!
لأ.. السيسى اللى مسك..
_ السيسى؟؟ مين السيسى ده؟
دا وزير الدفاع بتاع محمد مرسي"
لم ينتهِ الحديث لكن عندما تقف عند نقطة اللا فهم... قال الناشط: "الخط اتقفل في وشى"، لم ينتهِ الحديث ولكن المشهد فيه دائرة مفرغة... ولا أي اندهاشة!