شاهد.. أسئلة نجلة صباحى الخمس لأنصار المشير السيسي

هاجمت سلمي صباحي نجلة المرشح الرئاسي حمدين صباحي ومؤسس التيار الشعبي البعض من مؤيدي المشير عبد الفتاح السيسي، ورصدت بعض الأسئلة التي تريد الرد عليها من أنصاره ومن سيعطوه أصواتهم في الانتخابات الرئاسية المقبلة.
حيث علقت سلمي عبر صفحتها الشخصية علي موقع التواصل الاجتماعي "فيس بوك" قائلة: "لكل صحابي مؤيدي السيسي عندي كام سؤال مش عارفه إجاباتهم أتمنى تفيدوني..
1- أنتم شايفين اللي السيسي عمله في 4 يوليو جميل في الشعب المصري ولا واجب عليه كرجل عسكري وطني؟
2- في الانتخابات الرئاسية إزاي معندكوش مانع تنتخبوا مرشح معندوش برنامج انتخابي؟ طب هتحاسبوه على إه؟!
3- أنا عارفه إن أغلبكم ممكن يكون مش مع ثورة يناير أصلًا، لكن دي كانت ثورة شعب وراح فيها شهدا واتصاب فيها كتير.. تفسروا بأه أن تقريبًا كل رموز الفساد في النظام القديم اللي قامت ضدهم الثورة دي وعلى رأسهم مبارك نفسه مؤيدين للسيسي؟
4- في الانتخابات الرئاسية في العالم كله لما يكون في اتنين مرشحين للرئاسة لازم تتعمل بينهم مناظرة علنية على الهوا قدام الشعب كله ومش من حق المرشحين الاعتراض أساسًا لأن ده حق للشعب.. تفسروا بإه رفض حملة السيسي للمناظرة! هل ده ضعف ولا خوف من قوة المرشح المنافس!
5- الرئيس هيكون عايش معانا "ع الهوا" مش هيقود البلد "بالمونتاج" .. تفسروا بإه عدم ظهور السيسي ع الهوا ولا مرة وليه كل لقاءاته ممنتجة؟! وتفسروا بإيه عدم نزوله في مؤتمرات شعبية وسط الناس مع إن ده تقليد أساسي في أي حملة انتخابية في العالم؟ مش يمكن ده يتفسر إنه "تعالي" على الناس أو عدم ثقة في النفس؟
وتابعت "نجلة صباحى": دي أسئلة كتبتها بمنتهى الاحترام ليكم ولمرشحكم لأني مؤمنة إن المنافسة لازم تكون شريفة ونضيفة وعايزة أعرف إجاباتها منكم بمنتهى الذوق.. يا ريت تجاوبوا بجدية في التعليقات وأشكركم على سعة صدركم وخليكوا فاكرين الرئيس بيروح وييجي والشعب باقي،، إحنا اللي باقيين لبعض".