شهادة طالب بجامعة القاهرة: الداخلية قتلت "عمر أسامة"

تداول نشطاء عبر موقع التواصل الاجتماعي "فيس بوك" شهادة أحد طلاب كلية الحقوق جامعة القاهرة عن مجمل أحداث الأمس التي شهدتها الجامعة وما أعقبها من استشهاد "عمر أسامة" أحد طلاب الفرقة الثانية كلية التجارة .
وقال الطالب الذي شهد الأحداث منذ بدايتها والتي نشرتها الصفحة: مجموعة من الطلبة في حقوق أو ناحية باب رئيسي عملوا مظاهرة ثم فجأة سمعنا صوت انفجار.. والناس كلها بتجري, كانت بدأت الناس تتجمع ناحية جوالة الكلية كده وسلم علوم .. وكذا طالب متشال ورجله متقطعه وغرقانه دم, واللي وشه غرقان دم .. جايين من نواحي حقوق لحد عندنا..
وأضاف: سألنا فيه أيه "قالولنا في قنبلة مسامير اترمت علينا في حقوق، وتابع: "بعدها بخمس دقايق.. الناس كلها جايه تجري من نواحي باب رئيسي لكلية تجارة عندنا.. والشرطة وراهم وشغالين ضرب، طبعًا في بنات أغمى عليها كتير وفي طلبة كتير وقعت واتصابت.. وكان في مظاهرة صغيرة جدًا متعديش 20 طالبًا وطالبة كانوا بيكبروا وبيهتفوا ضد الداخلية لدرجة إن باقي الطلبة العاديين اللي كانوا بيجروا من الشرطة ومن ضرب الخرطوش هتفوا معاهم.
وأكد الطالب أن "مدرعتين دخلوا الجامعة ووصلت لحد باب المترو, وأن الطلبة كانت بتجري أدامهم زي ميكون شوية فراخ! أنا مش عارف أقول أيه! حسبي الله ونعم الوكيل.. مبقيتش عارف مين اللي غلط من اللي صح!! القنبلة دي مين اللي رماها؟؟!!
واستطرد: "الناس قاعدة بتمتحن في القاعات والخرطوش طالع عليهم, ومدرجات اتفتحت ودخلوا فيها الطلبة وقفلوها عليهم! وأضاف "وقت مالبنات كانت بتجري نواحي باب المترو راح الأمن قفل الباب بالمفتاح وساب الناس محبوسة جوا وجري!
واستكمل الطالب شهادته: الأحداث شهدت حالات كثيرة للقبض على الطلاب لحد ما الطلبة كسروا الباب وخرجوا منه بيجروا! وعلى أثر هذا الضرب استشهد عمر أسامة - طالب بالفرقة الثانية كلية التجارة جامعة القاهرة إثر الاشتباكات بين الطلاب وقوات الأمن داخل الحرم الجامعى.
وتساءل: "مش حرام اللي بيحصل ده؟؟ في شرع مين؟ في دين مين وشرع مين؟, أنا عايز أفهم ليه كده؟ لأ وفي الآخر هتبصوا للتليفزيون هيقولوا إن الطالب اللي توفي توفي قبل وصول الداخلية لمحيط الجامعة، مستكملًا "دأنا شايف الناس بعيني بتترمي وبتجري! مناظر البنات النهاردة قمة في الخوف والرعب والعياط والانهيار!
وأضاف لأ وبحجة إن الناس إخوان! إخوان أيه؟؟ وربنا ما موضوع إخوان ولا حاجة!! الكاميرات اللي اتعلقت في كلية التجارة المفترض إنها تكون شغالة صح؟ يا ريت عميد الكلية المحترم.. يعرض فيديوهات الكاميرات كلها ويشوف سبب وفاة الطالب وتوفى قبل وصول الداخلية زي ما هما قالوا ولا توفى إزاي.
شاهد الصور