أبو زيد والحبش والكلاب

عاوز تشوف مين السبب.. عاوز تصب جام الغضب.. ع اللّي حوجنا للحبش... واللي مسلم دقننا للسد ولغول العطش.. من نام وساب شربة عيالنا تتلطش.. شغل الطناش.. شغل اللّبش.. تعالى ننبش ف الّلي كان.. وارجع زمان.. من كام سنة.. لحكاية أبو زيد.. محمود أبو زيد.. كان وزير للري وشئون المياه.. طب إيه بلاه.. ليه اتلقط واتشال لوحده.. كان إيه وراه.. والنطع ليه غضبان عليه.. ليه سقعّه.. ليه طلّعه.. وعلّم عليه.. ممنوع يناقش أو يقول.. دوّر تشوف مين السبب.. تسمع عجب.. يعني الحكاية موش زيارة من يومين.. لأ.. دي الحكاية بايتة تحت وش الأرض تغلي من سنين.. أيوه معاك لازم نحاسب.. لازم نحاسب ع اللي كان.. لازم نحاسب م اللي جاي.. بس نعرف قبله مين صاحب الحساب.. وياهَل تري خلّص وتاب.. ولا لسّه شغّال ف السواد.. عمّال يلطّخ لون حياتنا بالهباب.. مين.. مين كان مطنش وساكت لجل يوم كتب الكتاب.. كتب كتاب المحروس ع المحروسة.. لازم حساب.. لكن اوعى تسمع للكلاب.. لازم حساب للّي غلط.. موش للّي جيْ يلمْلم في الطحين اللّي اندلق.. أوعاك تصدق للكلاب.. اللّي عشان تعمل قلق.. بتلخبط الكراريس وتلحس في الكتب.. لازم حساب.. بس اوعى تسمع للكلاب.
مصريات مناويشى
أصل الزعامة أدب
أصل الزعامة أدب ... موش بس هز اكتاف
لابيان ف صوت العرب ... ولاسهرة تحت لحاف
ولا "وردة" لجْل المشير .. أبوسمعة "برلنتي"
ولا عندليب ينْجلي .. ويعدد الأوصاف
--------------
لمّا النسور تِنْدبِحْ .. ع الأرض زي البطْ
لا فيه جناح انفرد .. ولاشال لفوق ولاحطْ
ماسيادته كان سهران .. بِيْمِز ف البارتي
بيدلك السيقان .. ويلمِّس الأكتاف
--------------
وبعد كل اللي كان .. قال "أحّة" . بيتنحّى !!
ويقول سماح ياغجر .. غلطة .. نصلّحها
لو كل نطع انهزم .. عيّط وقال "عندي"
ماكانش "هتلر" خلع .. من بعد نورماندي
أصل الرجولة شرف .. أما الحريم أصناف
وأكم شنب .. خوّاف
وأكم شنب .. خوّاف




صباحك ... مناويشى
* لحظة البداية للانهيار هي اللحظة التي يسلم فيها "القائد" زمامه "للقوّاد" أو التي ينجح فيها "القوّاد" في ارتداء قناع "القائد"... من خبرة 30 سنة مع "سيادة النايب".
*يعني قعدنا واتربّعنا واستنّينا التدويل: وأهو الراجل جه وكل وانبسط ودخل يمدد... وقالوله "تدويل" قالهم "بعد المداولة".
* عادة لا تكتمل الثورات إلا بظهور " الأستاذ " و" العندليب"... الأول من أجل العامة... والثاني من أجل النخبة... من خبرة 60 سنة ثورة.
* سؤال "باسم": مرتضيها إزاي وساكت... عادي ومبلسم ضميره... ولا "أونكل" زي غيره ... غيرشي بس لسانه فالت.
* شقاوة مناويشي: مكتوب جمعنا سوا... شمعة وأنا اجيدك ... واجطف من اللي استوى ... واجمع عناجيدك... واشرب شراب الهنا... من سلسبيل... جيدك.
* "ضرب نار": قرار الدستورية بمساواة الجيش والشرطة بسائر المواطنين في حق الانتخاب (والترشح) يلزم أن يستكمل بقانون آخر لمساواة سائر المواطنين بضباط الجيش والشرطة في حق امتلاك واستعمال السلاح إذا لم تعجبهم النتيجة.
* فاصل.. ع الحاصل: عبد الجنيه... قال للباريه ... ارجع يابيه ... لا تقولي ثورة ولا انشراح... وادي كام وشاح... ح يخلوهالنا سداح مداح... بس انت أشر بالسماح... أنا أصلي موش عارف أعيش... من غير فساد... زي اللي راح


وشوش مناويشى
عم الشباب
حشّاش وحالك بالبلا ... موش مشكلة
الكيف مرض
أراجوز وخلصت نمرته!!
أدّى الغرض
آل جي ويال المهزلة!؟
عامل أسد...
عايش في دور المعترض--------------
البِسْ تياب وحش الفا
بس بشياكة وجنتلة
لكن بقى قلة أدب
ولسان طويل ... شغل الجلاارجع يَالَه ...
--------------