هاخطف حبيبتي

أنا سيد سواق "توك توك" عندي 30 سنة، ومعايا دبلوم صنايع، وعارف ربنا وبصلي والحمد لله، وحالتي معقولة، وعندي مشكلة يا أبلة، إنى بحب واحدة من المنطقة، كنت بوصلها عشان تركب المترو لكلية الهندسة، وهى حبتني برضه، لكن كلمت أبوها رفض وحكم عليها متركبش معايا ولا تكلمني بعد كدة وبكلمها على الموبيل وأما أبوها عرف اتخانق معايا مش عارف إزاي أخليه يوافق ممكن أتجوزها من وراه ولا رأيك أيه وشكرًا.
(الحل)
يا أخ سيد.. الزواج لابد أن يقوم على التكافؤ بين الزوجين, وكما فهمت من رسالتك أن حبيبتك طالبة بكلية الهندسة، ويوم ما ستصبح مهندسة وتتغير نظرتها للحياة تكون أنت أول من تتمرد عليه, فأنصحك بالابتعاد عنها، وسيوفقك الله تعالى مع من تحبها أكثر ويكون وضعها الاجتماعي متكافئ معك ومناسبة لك ولظروفك, ولكن الأمر اللي زعلني منك جدًا أنك فكرت تتزوجها دون علم والدها.
أنت بتقول أنك بتعرف ربنا وبتصلي, فهل ده يرضى ربنا؟ إنك تشجعها على أنها تعصي أباها وتتمرد عليه وتقطع رحمها؟, فحتى لو كانت ظروفها متوافقة معك في كل شيء ومناسبة لك وكان موقف والدها نفس الموقف, فهل ترضى على رجولتك أن تخطفها أو تسرقها من أهلها أو تجبرهم رغمًا عنهم؟ هل ترضى بذلك إن فعلته أختك أو بنتك؟, اتق الله يا سيد في بنت الناس, فلا تدرى ما الذي تخبأه الأقدار لك, وزى ما عرفت من رسالتك أنك سائق توك توك يعنى ابن بلد وجدع وشهم, وأظن أن أولاد البلد الجدعان ميعملوش كده أبدًا حتى لو هى صاحبة الطلب, فأتمنى ألا تفكر في مثل ذلك الفعل أبدًا مهما كانت الظروف أو الضغوط, وقتها ربنا سيرضيك بأفضل منها إن شاء الله.
لإرسال مشكلتك والتواصل مع الأستاذة/أميمة السيد
almesryoon.openheart@gmail.com
...........................................