أكدت "نرمين يسري" - الناشطة الحقوقية - صحة رواية وجود ثعابين بسجن القناطر ، مشيرة إلى أنها بحثت في الأمر وأكتشفت إمكانية وصول بعض الثعابين الخطيرة مثل "الكوبرا" إلى داخل السجن حال استمرار الوضع على ما هو عليه . وقالت في تدوينة : طيب أنا من امبارح قاعدة بقرأ في كل المصادر اللي لقيتها عن أنواع الثعابين الموجودة في مصر (على خلفية الثعابين اللي بترتع في عنابر سجن القناطر)، للأسف المصادر مش كتير و المعلومات مش دقيقة.. لكن اتأكدت على الأقل ان فيه من أنواع الثعابين الخطيرة زي الكوبرا و ال vipers بيعيشوا في الزراعات عادي، مش بس في الصحرا زي ما كنا فاكرين." وأضافت : "طبعًا صعب جدًا نطلب من البنات وصف للثعابين اللي بيشوفوها عشان نحاول نحدد دي ايه و ايه مدى خطورتها، لكن احتمال مش بعيد ان يبقى فيه من الثعابين دي سامة.. مضيفة: "بعض الأنواع السامة بتزحف بسرعة 20 كيلو في الساعة، يعني صعب جداً حد يجري منها، و سمها يقتل بني آدم بالغ في نص ساعة" وتابعت : "ف يعني نقول تاني؛المسجونات في سجن القناطر بيشتكوا بقالهم كذا يوم من وجود ثعابين في العنابر، منها ثعبان كبير محدش عرف يقتله، و من وجود بيض ثعابين كمان في شقوق العنابر.. طبعاً العنابر دي مقفولة على سكانها المسجونين أغلب اليوم، ف تخيلوا الرعب انكم مسجونين في مكان واحد مع تعابين!! فيه بنات مش بتقدر تنام من الرعب! و تخيلوا كمان لو تعبان سام -لا قدر الله - عضّ مسجونة او حاجة، تعتقدوا بالروتين العقيم بتاعهم ده هيلحقوا ينقلوها مستشفى او مركز السموم قبل ما يجرالها حاجة؟؟" واستدركت : "أبسط حقوق المسجون انه يعيش في مكان آمن على الأقل .. أهالي المسجونات مستعدين يدفعوا ثمن التخلص من التعابين دي و سد شقوق و جحور الزنازين لمنع رجوعها، بس محدش بيسمعلهم للاسف.. خليكم صوتهم طالبوا معانا بتطهير سجن القناطر من التعابين عشان المسجونات يقدروا يعيشوا فيه" بحسب تعبيرها.
