أسود تحولت لقرود

 (ماما الحياة فى فضول) قل لى يا جوجو أزاى عرفت حكاية مصر؟- (قال هامسا فى خطورة) الكبار ما يعرفوش إن فيه لغة سرية بيتكلمها الجنين فى بطن أمه- (الحياة مأخوذة بالمفاجأة) يا خبر! يعنى أنتم بتكلموا بعض!- (وهو يكتم ضحكة) يووه!
بنتخانق ونتصالح ونعرف الأغانى الجديدة (ثم متفاخرا) ده أنا معلق عشر بنات فى بطون ماماتهم- (ماما الحياة ضاحكة) آه يا عفريت وعامل نفسك مش عارف البنات!- (جوجو فى زهو) محسوبك بلا فخر مقطع السمكة وديلها- (الحياة تفطس من الضحك) واضح (ثم فى فضول) بس مين بيحكى لكم أحوال مصر؟
(جوجو مفسرا) احنا متفقين أن اللى ينزل الأول يحكيلنا اللى بيحصل بره. أصل المولود بيفضل فاكر اللغة السرية لغاية ما يتعلم كلام الكبار، بعدها ينساها على طول- (فى فضول) طيب اللى اتولدوا قبلكم قالوا لكم إيه؟- (وهو يقلب شفتيه فى يأس) والله كل اللى نزلوا فى مصر مش مبسوطين وعاوزين يرجعوا تانى لبطن ماماتهم. عندك رشا مثلا قالت لى امبارح أوعى تنزل، الأوضاع عندنا وحشة، ونصحتنى أفضل هناك- (فى دهشة) رشا مين؟- (فى لا مبالاة) دى حاجة طيارى كده.
بنت كنت معلقها فى بطن أمها، بس نزلت قبلي- (فى غيظ) يا بن الإيه؟ وقالت لك إيه كمان؟- (وهو يضرب كفا على كف) قالت لى إن الأوضاع فى مصر راكدة، وبتقاوم التغيير- (الحياة وهى تتنهد) للأسف دى الحقيقة- (جوجو يتساءل فى فضول) وانت راضية عن كده يا أمى؟- (الحياة فى حزن) طبعا لأ لإنه ضد إرادة الحياة- (جوجو يتساءل فى فضول) وإيه هى إرادة الحياة؟-
(الحياة تقول فى ثقة) التغيير هو كلمة الطبيعة، مولود جديد، جيل جديد، دم جديد، قيادة جديدة. الطبيعة ما بتغلطش لكن الإنسان بيغلط، الميه لما بتركد بتفسد، والنهر لو ما جريش ما يتشربش منه، خلايا الجسم بتجدد نفسها. الفصول الأربعة بتتعاقب، والثمر له مواسم، والزرع بيموت ويرجع للحياة. الشمس بتشرق وتغرب، والقمر بتتغير منازله، بعد المحاق بدر، وبعد البدر محاق.
الطبيعة بتشاور لنا على الطريق من طرف خفي، وبتلهمنا نعمل إيه. عمرك شفت أسد عجوز بيقود قطيع الأسود؟- (فتساءل جوجو) طب لو افترضنا إن الأسد العجوز مش راضى يسيب؟- (قالت الحياة فى كياسة) القطيع مش حيسمح له.
حيقول له شكرا يا جدو الأسد، أديت دورك ودافعت عن العرين، دلوقت جه الوقت ترتاح وتترك القيادة لغيرك من أجل مصلحة القطيع- (جوجو فى لماضة) طب لو فرضنا إنه (زرجن) ومرضيش يسيب؟- (قالت الحياة مبتسمة) يحصل اللى جرى عندكم، يتحول قطيع الأسود لقطيع قرود.