جوجو يكتشف الحقيقة

 (جوجو فى رجاء) ماما الحياة، أنا عاوز أعرف الحقيقة وما تخدعينيش، وتقوليلى العيوب قبل المزايا فى العالم الجديد - (الحياة فى حيرة) طبعا يا حبيبى الحياة لا تخلو من المتاعب - (فى توجس) إزاى؟ - (فى إحراج) يعنى حتمرض وبابا يجيب الدوا ويمكن تاخد حقنة فى (البوبّو) - (باكيا) آه يا (بوبّوهى) يا نا، وإيه كمان؟ -
(وهى تدارى بسمة) ولما تكبر حتروح المدرسة - (فى فضول) إيه المدرسة دى؟ - (ضاحكة) بتاعة كده بتصحى لها من ستة الصبح، تدخل مبنى زى السجن، تفضل فيه ست ساعات، لو ما عملتش الواجب تضربك المدرّسة، ولو عملته يضربوك العيال - (ساخرا) الله يطمنك - (مبتسمة) ما هو مش على طول ضرب، فى الفسحة حتلعب كورة - (مندهشا) إيه الكورة دى! -
(ساخرة) بتاعة منفوخة ومدورة تجرى وراها لغاية ما ينقطع نفسك، وفى الآخر تشوط - (فى ملل) طيب ما أنا باشوط فى بطن ماما بعزم قوتى، تحبى أوريكى؟
(فى رثاء) لأ اوعى. مسكينة يا ماما (ثم فى إغراء) ولما تكبر يا عم حتحب بنات وتتجوز - (فى فضول) يعنى إيه بنات؟ - (ضاحكة) مخلوقات جميلة شعرها طويل وبشرتها ناعمة وكلامها حلو - (فى رضا) لو كده يبقى ماشى، والبنات دول حاعمل معاهم إيه؟ -
(الحياة تكركر من الضحك) ما ينفعش أقول لك عشان الرقابة حتحذفها - (يفطس هو الآخر فى الضحك) طيب أنا نازل أشوف الموضوع ده - (الحياة محرجة) بس للأمانة لازم أقولك إن المسألة مش بالبساطة دى - (فى فضول) إزاى؟ -
(فى إشفاق) قبل الجواز لازم تجيب شقة - (فى دهشة) طيب ما اجيب شقة، إيه المشكلة؟- (ضاحكة من سذاجته) الشقة غالية - (فى فضول) بكام؟ - (مقهقهة) من نص مليون لمليون - (فى قلق) ومرتبى حيبقى كام؟ - (فى يأس) لو ذاكرت وتعبت وتخرجت فى الجامعة مرتبك بكتيره خمسميت جنيه - (ضاحكا) الشقة بنص مليون ومرتبى خمسميت جنيه! - (تكركر من الضحك) آه - (حيموت من الضحك) وعاوزانى أنزل! - (تفطس من الضحك) أيوه - (فى جدية مفاجئة) إنتى بتتكلمى جد ولا بتهزرى؟! -
(الحياة فى حزن) للأسف باتكلم جد - (فى رعب) الكلام ده لا ينطبق على أى مكان فى العالم إلا فى حتة واحدة بس - (الحياة تتساءل فى دهشة) فين؟ - (صارخا ومولولا) يا حظك الأغبر يا جوجو! يا مصيبتك السودة يا جوجو!. معنى كده إنى حاتولد فى مصر!.
(اتعظ يا مؤمن! سمعة مصر المتدهورة وصلت للأجنة فى بطون أمهاتهم. كيف عرف جوجو أحوالنا المتردية، وهو - لا مؤاخذة فى الكلمة - لسه فى بطن امه، انتظر غدا المفاجأة الرهيبة).