أسئلة بريئة

دخلنا مرحلة الفقر المائى
والبقر الإثيوبى..
وأنا مش مسطول
حتى فتشى جيوبى..
لكن ساعات
بتبقى أهم مميزاتى
هى أكبر عيوبى..
اطمنى..
أنا مش ناوى أبطل عشق
ولا جاى ألومك
وأرمى عليكى
كل ذنوبى..
أنا طول عمرى بحب الناى..
زى ما حبيتك كده
وماعرفش جت معايا إزاى..
لكنى بكره الربابة
وجوايا شوية أسئلة
محتاجة لإجابة
مين اللى عمل فينا كده
ولاّ إحنا طول عمرنا كده
ولاّ دى مجرد سحابة..
ومين اللى فتح جناين الورد
للوحوش والديابة
وراحوا فين شوية الغاز اللى حيلتنا
وفين حق الغلابة
ويا ترى الرئيس اللى جاى
تحميه شرعية
ولاّ تحرسه دبابة..