الهجرة غير الشرعية

محتار وعايز فرصة عمل                فاقد كل خطوط الأمل
ياما سمعت وعود وعهود                 وحلم رسمته ضاع واختمل
محتاج مش لاقى إيد تتمد                  وكل ما بافتح باب يتسد
أسيب ترابك أنا يا بلادى                  أتهان وأتبهدل أمد اليد
وكل ما برجع أحلم تانى                   ألاقى طريق الحلم اتهد
متحطم من يأسى باعانى                  والكل ناسينى سلبى أنانى
معايا شهايد مش نفعانى                   وابعت شكوى ماجانى الرد
نفسى ألاقى عمل يكفينى                  مش عايز أنا ملايين تتعد
مش عايز أنا فيلا وعربية                عايز لقمة يا دوب ع القد
أنا محروم فعلاً من خيرك                باهاجر أشحت أنا من غيرك
دا أنت يا بلدى نبع حنان                   ليه ما بتدى حنان لطيرك؟
مقفول قدامى كل طريق                   مش لاقى حتى شعاع لبريق
أفكر أهاجر أحسن وضعى                أروى عطشى أبل الريق
دافع تمن السفر ديون                       أرجع مترحل جثة غريق
أفكر أهاجر أروح أتهرب                  حاسس انى عايش متغرب
وكل ما بحضن فيكى أتقرب              بتقسى ألاقى الحب اتسرب
خدعونى قالوا «إيطاليا» جنة             رحت مجازف أنا ومجرب
مراكب مافيا والموج عالى                 شفت الموت ونهبوا مالى
انت يا وطن الأمل الغالى                   انت أبويا وعمى وخالى
ليه بتقسى عليَّا كتير؟                        عايز نظرة عطف لحالى
خلينى أعيش وياك متهنى                   يا تقولى سفيرنا هناك مستنى
جوازى معايا باسمك أغنى                 هجرة سليمة بتخطيط فنى
أكسب رزقى أتمنى أرجعلك                وألاقى حلمى معاك اكتمل
راضى على أحمد حسين