قصة عجيبة جداً

(أنا) إيه يا عم؟، ما شفتكش إمبارح!. (هو) آه صحيح، أنا ما قلتلكش على اللى حصل. (أنا) خير؟. (هو) بص يا سيدى، إمبارح كنت معزوم أنا وأصحابى على رحلة نيلية. كل واحد جاب مراته أو خطيبته وطلعنا من جنب شيراتون القاهرة. (أنا فى سرى) فهمت قبل ما يقول، أكيد قلبت بغم( ثم بصوت عال) وبعدين؟.
(هو) كان الجو جميل جدا، شتائى لطيف والشمس عاملة زى قرص الفضة والرحلة رومانسية جدا. (أنا فى سرى) طبعا أنا متوقع النهاية، أكيد المركب اتقلب بيهم (ثم بصوت عال) كمل. (هو) والسحب بتلعب، شويه ترسم صورة بطة أو فيل بزلومة أو طفلين بيجروا ورا بعض.(أنا فى سرى) ما هى دايما بتبتدى كده وبعدها تحصل مصيبة، أمال ليه لما بنضحك أوى بنقول: اللهم اجعله خير!. ده إلهام جوه المصريين إن الفرح مش من حقنا(ثم بصوت عال) وبعدين؟.
(هو) خط سير المركب إنه يروح المعادى ويرجع للزمالك. (أنا فى سرى) كده فهمت. أكيد اللى فوق رموا عليهم الزبالة من فوق الكوبرى، عموما ده أرحم من حكاية التمساح (ثم بصوت عال) هه وبعدين؟. (هو مستاء) إنت مش معايا خالص. (أنا مبتسما) أصلى افتكرت حكاية التمساح.
(هو فى دهشة) تمساح إيه؟ هو فيه تماسيح؟. (أنا مقهقها) ماتاخدش فى بالك، دى حكاية قديمة نشرتها الصحف من كام سنة، واحد خد البنت بتاعته وطلعوا يتفسحوا فى النيل، طلع لهم تمساح عضّه لا مؤاخذة فى مؤخرته ويظهر طعمها ماعجبوش فنفدوا بجلدهم. أتارى التمساح كان فى قرية سياحية على النيل وبعدها هرب (ثم فى نفاد صبر) كمل وبعدين.
(هو محاولا أن يستعيد حماسته) النيل كان بصراحة تحفة، لونه فضة، وريحته منعشة، وانعكاس الشمس عليه زى الدهب وأم كلثوم قاعده تغنى (رافعا عقيرته بالغناء) عطر إيه، ده العبير اللى فى إيديه يقول: إيديه هى العبير. شعر إيه ده الكلام اللى فى عينيه خلى أحلى كلام يغير. (مبتسما) يا سيدى على الحب، وبعدين. (هو منهيا الحديث) بس انبسطنا وكان يوم حلو أوى.
(أنا مستحثا) وبعدين؟ (هو فى دهشة) ولا حاجة. (أنا) يعنى فين المصيبة اللى حصلت؟. (هو مستغربا) مصيبة إيه؟ ( أنا) إنت مش بتحكيلى الحكاية عشان تقول لى إن فى الآخر تمساح عضك أو القارب انقلب بيكم أو رموا عليكم زبالة أو صاحب المركب اعتدى عليكم!.
(هو متضايقا) يا أخى فال الله ولا فالك، ولا حاجة من دى حصلت. (أنا مستوثقا) إنت عاوز تقولى إنك قمت برحلة رائعة مع أصدقاء ظراف زى مابيحصل فى باقى بلاد العالم واستمتعتم بالطبيعة، وانتهت الرحلة على خير؟. (هو مستغربا) إيه؟ غريبة دى!. و(أنا أضرب كفا على كف) غريبة بس، دى أغرب حاجة سمعتها. أكيد القيامة حتقوم، استر يارب.