تحيه لكل من يسب أمه مصر

كتر الكلام عنك وفيكي
واللي عاشوا في وسط خيرك
نكروا خيرك لعنوا فيكي
نسيوا إنك ربيتيهم خليتيهم نور عنيكي
لما جاعوا أكلوا ثمرك شربوا ميه من إيديكي
لما خافوا من ظلام الليل يليل جم عليكي
ارتموا في أحضان حنانك
واحتموا في أسوار أمانك
والنهارده نسيوا خوفهم وبسيوفم بيدبحوكي
وبكلامهم يشتموكي
مع إن المفروض عليهم يعذروكي
يبنوا سور من الحب حواليكي
ويستروكي
أو من لسانهم يرحموكي
فيها إيه لو يوم نقاسي
ما الحياه دايما مقاسي
فيها إيه لو مره جوعنا
أو في مره ذاد وجعنا
أو تعبنا من البطالة
والموصلات الزبالة
ولا من الناس اللي تنهب مهما تنهب
وإحنا في أسوءها حالة
مش مهم مرتبي
كل عام ينقص جنيه
والحرامي فيكي ماشي
وفي جيوبه مليون جنيه
وفي النهايه أكون فقير
وهو يبقي إسمه بيه
مش مهم
مش مهم ديمقراطية
ملعونه سيره الحرية
ويا نسبه الأمية
مش مهم مين يعيش
مش مهم مين يموت
مش مهم يكون لي فيكي
أي صوت
أي حق أو نصيب
وهستمر في السكوت
ولا عمري يكون طويل
أو في ثانيه عمري يفوت
مش مهم أي حاجه مش مهم
المهم تكوني أنت ليا أم