«المنافس كسب 20 مليون دولار من بيع لاعب واحد».. الغندور يهاجم مجلس الزمالك

فتح خالد الغندور نجم الزمالك ومنتخب مصر السابق، النار على مجلس إدارة القلعة البيضاء، بعد خسارة الفريق السوبر المصري أمام الأهلي وتراجع الأداء.
وخسر الزمالك بطولة السوبر المصري، بعدما تلقى هزيمة مريرة أمام الأهلي بهدفين دون رد، في المباراة التي جمعت بينهما يوم الأحد الماضي، على ملعب محمد بن زايد.
وكتب خالد الغندور عبر حسابه على موقع التواصل الاجتماعي «فيس بوك»: «عايز أتكلم معاكم شوية عن نادي الزمالك.. وعايز جمهور الزمالك العريض اللي بالملايين في مصر وفي العالم العربي يسمع كلامي ويفكر فيه بهدوء ويكون فيه نقاش عقلاني هادئ».
أضاف: «الأول نحدد شوية نقاط.. هو الزمالك ملك مين؟!.. سامعك ياللي بتقول الدولة.. إجابتك مش صح، الزمالك ملك جماهيره، ثم جمعيته العمومية، والدولة بتحط القوانين واللوايح اللي بتنظم العمل، بيتم بطريقين.. الطريق الأول: طريق مجلس إدارة منتخب من الجمعية العمومية للعمل تطوعيا.والطريق التاني: طريق إشراف الجهة الإدارية عشان بس الأمور تكون واضحة فالزمالك ملك جمهوره، ومعظم جمهور الزمالك يكاد يكون متفق إن الزمالك مش نادي الدولة وإنه بيتعرض لمؤامرات ضخمة في كل شيء.. تمام جدا، ممكن نركن القناعة دي على جنب شوية ونشوف وجهة نظر أخرى».
وواصل: «هل البيت الزملكاوي من الداخل على ما يرام وفي أفضل حال؟!، هل المجلس المنتخب الحالي اللي بسم الله ماشاء الله مليان برجال الأعمال وكانوا موعودين بدعم ورعاية الملياردير المعروف ممدوح عباس اتفاجئ بمشاكل الزمالك؟».
وزاد: «طيب المجلس السابق مجلس المستشار مرتضى منصور أهو وبالاسم كانت له حسناته وله أخطاؤه، السؤال بقى المجلس الحالي ده إيه هى حسناته؟، هل حافظ على قوام الفرق الرياضية؟ ولا فقد نجوم الكورة والباسكت وغيرهما؟.
وأكمل: هل تعاقد مع صفقات سوبر؟ هتقول لي الفلوس والأزمات هقولك الزمالك بس السنة دي متعاقد مع 10 لاعيبة على الأقل، هل فيهم صفقة سوبر؟ طيب مش كان الأفضل بفلوس ال10 اشتري تلاتة ولا أربعة سوبر ستار وأسدد فلوسهم بدل ما أشتري 10 مع كل احترامي لهم لاعيبة كويسة، بس مش طموح أصحاب النادي الأصليين«.
وأردف: «الجمهور يعني ببساطة وعلى سبيل المثال الجزيري ومنسي أعلى بمراحل بعيدة من الدباغ، ومصطفى شلبي أعلى بكتير من شيكوبانزا، هل المجلس يقدر يجيب مدرب أجنبي تقيل؟، هل اللاعيبة بتقبض طبيعي زي أي نادي؟، هل نفسية لاعب الأهلي وبيراميدز وسيراميكا والمصري، زي نفسية لاعب الزمالك؟».
وشدد: «هو مجلس رجال الأعمال المحترمين لو معندهمش حلول للأزمات.. اترشحوا ليه أساسا؟، هل الدولة قاصدة تسحب الأرض من الزمالك؟ هل يعقل إننا نصدق كلام زي ده، هل المجلس قام بدوره على أكمل وجه في استثمار الأرض أولا، ثم في علاج المشكلة لما حصلت؟ أكيد أكيد
الدولة هتقف جنب الزمالك، عشان جمهوره مش عشان مجلسه، كتير من الزمالكاوية زعلانين أوي إن تمثيل الزمالك في المنتخب قليل أوي، صح هو قليل بس يا ترى عشان حسام حسن أهلاوي ولا عشان المؤامرة الدايمة على الزمالك؟، ولا يا ترى فيه سبب تاني.
وزاد: «عد معايا كدا وعلى أقل من مهلك خالص، زيزو، إمام عاشور، ياسر إبراهيم، ياسين مرعي، أحمد عيد، أسامة فيصل، أحمد الشناوي، هما دول كانوا لاعيبة مين؟!، ويا ترى إيه الظروف اللي مشيوا فيها؟، خدوا بالكم أنا مش بنكر إن الزمالك بيتعرض لظروف غير طبيعية، وبيتعرض لظلم بس عارفين، أحيانا المظلوم بيستفيد من اللي بيحصل له عشان يداري كسل أو فشل، ما خلاص بقى أنا مظلوم معاكم مثلا في إن فيه قرار أو اتنين في نهائي السوبر مش صواب وكمان أثروا ع النتيجة ده اسمه الظرف الخارجي، لكن يا ترى إيه منع عمرو ناصر إنه يسجل هدف من فرصة أكيدة، وإيه منع شيكوبانزا يمرر لناصر ماهر في حلق المرمى الخالي، وإيه منع عبدالله السعيد يمرر انفراد لعمر جابر، مهم جدا جدا إنك تكون مظبوط من الداخل قبل ما تشتكي الظلم والظروف».
واستطرد: الزمالك محتاج إنكار ذات، مش هكلم اللاعيبة حرام عندهم التزامات ومسؤوليات ولا هكلم الجمهور، لكن هكلم مجلس الإدارة وكبار رجال الأعمال الزملكاوية، اتحركوا عشان فك القيد وتسديد المستحقات، إوعوا تتبرعوا عشان صفقة، لازم الأول ننهي مشاكلنا اللي عندنا، لازم الزمالك يشكل وفد قانوني محترم يفاوض على استرداد الأرض، الوحيد اللي يستحق الشكر والتقدير هو الجمهور، اللي بيدعم الفريق في أصعب الظروف، الجمهور ده واجب على ككابتن سابق للنادي أنبههم وأنا منهم لشيء خطير هو إنه كتير من الزمالكاوية بدأ يرضى بأقل القليل وبإن الفريق يظهر كفريق مكافح زي ما حصل قدام بيراميدز«.
وأكمل: «الشعور ده خطير وخطورته إنه ممكن يحول الزمالك من قطب كبير لنادي عادي، يعني ما كانش يصح الزملكاوية يفرحوا بالتقفيل والتشتيت والدفاع قدام بيراميدز، مش دي شخصية الزمالك اللي للأسف هو الفريق الوحيد في السوبر، اللي ماسجلش ولا هدف كل الأمنيات الطيبة لنادي الزمالك وجمهوره وكل التنبيه لمجلس الإدارة قوموا بدوركم، استثمروا، أسسوا شركة للكورة، استثمروا في اسم النادي، شوفوا طرق مختلفة للرعاية، اتصرفوا دي مسؤوليتكم، المنافس الأهم في أسبوع واحد، دخل خزينته قرابة العشرين مليون دولار بسم الله ماشاء الله من بيع لاعب واحد (وسام أبوعلي) ومن مكافأة كاس العالم للأندية.
وأتم: «اتحركوا، اتحركوا حتى لو كانت التحرك بالتراجع، وهيفضل الزمالك كبير بجمهوره العظيم على فكرة فيه ملحوظة مهمة بس صعبة جدا، دوروا في الناشئين على لاعيبة فصيلة انتمائها شبه فصيلة انتماء عيلة إمام ويوسف وأحمد رمزي وعبدالحليم على وأيمن منصور، وجمال عبدالحميد ومحمد صبري، وعبدالواحد السيد، ومحمد عبدالشافي، وشيكابالا، ودول على سبيل المثال لا الحصر».