سقط فيها أثناء لعبه.. «بلاعة شبرا» خطفت روح «سليم» (معايشة)

كان «محمد» ينحنى أسفل «الأتوبيس» الذي يعمل عليه، محاولًا إصلاح عطل بسيط، بيما يقف ابنه «سليم»، ذو ال4 سنوات، يلهو ويضحك في دوائر صغيرة، في ساعة تجاوزت ال1 صباحًا بعد منتصف الليل، سكون ثقيل كان يلف شارعًا عموميًا في بهتيم بشبرا الخيمة، قبل أن ينكسر فجأة بصوت الأب يصرخ مذعورًا وهو يبحث يمينًا ويسارًا عن «فلذة كبده»: «لقيته فص ملح وذاب»، لا أثر له ولا صرخة ولا خبطات قدم صغيرة حتى «ولا فردة شبشب لقيتها»، يقول الأب بصوت متعب: «على طول اتصلت بالمباحث، افتكرته اتخطف، بس لما عرفنا إن الاحتمال ده ضعيف، جت الحماية المدنية والصرف الصحي، وبعد 36 ساعة لقينا جثمان ابني في المجاري».. أما الأم، فانهارت حين رأت الجثمان، تردد والدموع تخنق صوتها: «ده كان صغير بس صاحبي، ده أول فرحتي بالدنيا كلها»، وتتهم مسؤولي الصرف بالإهمال الجسيم قائلة: «البالوعة بقالها 11 شهر مفتوحة من غير غطا».
مأساة أسرة فقدت طفلها في بالوعة صرف صحي ب شبرا الخيمة
كانت «ناريمان»، والدة الطفل «سليم»، لا تتخيّل أن خروجه مع والده فرحًا، سيتحوّل إلى كابوسٍ، على حدّ وصفها، تروي وهي تشير إلى صورة كبيرة لطفلها معلقة عند مدخل البيت حيث تُقام العزاء: «كان أبوه بينزل يصلح الأتوبيس اللي شغال عليه، وابنى كان واقف جنبه بيضحك وبيجري حواليه، وأنا كنت واقفة بعيد عند الأتوبيس اللي جوزى شغال عليه.. الساعة كانت واحدة بعد نص الليل، الدنيا كانت هادية جدًا».
تتوقف للحظة، تغالب دموعها، تقول ل«المصرى اليوم»: «أنا شوفت بعيني ابني بيلعب، كان بيضحك وبيلف حولين نفسه بعدها بثواني، أبوه قالى بصيت ملقتوش! نادينا عليه، محدش رد، حسّيت الدنيا بتلف بيا»، هرولت ناحية زوجها «قلت له (سليم) اختفى، قلنا يمكن حد خده، ولا مشي بعيد، بس لما دورت حواليين العربيات المركونة كلها، ما كانش فيه أي أثر، لا صرخة، لا صوت، حتى ولا فردة شبشب شوفناها».
أدركت «ناريمان» أنها إزاء مأساة، تتحدث عن تلك اللحظة بدلت حياتها: «جوزي اتصل على المباحث، افتكر إن الولد اتخطف، وبعدها جم رجال المباحث والحماية المدنية، وقالولنا احتمال يكون وقع في البالوعة اللي كانت على مسافة قصيرة من مكان ركن الأتوبيس.. أنا انهارت، صرخت، قلتلهم البالوعة دي مفتوحة من شهور، محدش بص عليها ولا غطاها».
كانت الساعة تقترب من الواحدة بعد منتصف الليل، كما تقول، حين عمّ المكان ذهول: «اتصلنا على بتوع الصرف الصحي عشان ييجوا، وأول ما توصلنا قالوا (واحنا مالنا)، وبعد كده اتصلنا على كذا جهة في الصرف الصحي، وبعد حوالي ساعتين أو تلاتة نزل الغطاسين يدوروا في البلاعة»، لكن البحث لم يُسفر عن شيء، تضيف «أم سليم»: «تاني يوم عملنا شكوى، وطلبنا إنهم يرجعوا يدوروا تاني، وبعدها طلعوه من البلاعة، بس بعد ما رموه تاني، كأنهم خافوا من الناس، عشان ما تحصلش مشكلة، لأن الأهالى كانت في حالة غضب من الإهمال والتباطؤ».
تفاصيل العثور على جثمان الطفل سليم بعد 36 ساعة
اقتراب من «الغطاسين»، سألتهم «إنتوا لقيتوا الواد ورموته»، تقول وهى تغالب دموعها: «لما روحنا لهم قالوا لا، ده غطا قديم.. بعد يومين اتصل علينا ولاد الحلال، وقالوا إنهم لقوه عند المصفى الكائن بعزبة أبوالعلا.. لما شوفته ما عرفتش أتكلم، كان جسمه كله بيجيب دم، لونه اسود، جسمه منفوخ، واضح إنه اتعذب حبيبى لأنه قعد كتير وسط مياه المجارى».
تؤكد الأم أنها لا تلوم الشرطة، بل تشيد بدورهم في البحث، لكنها لا تجد تفسيرًا لإهمال الصرف الصحي: «المباحث ما قصّرتش معانا، قاموا وقلبوا المنطقة كلها، لكن الغلط في الصرف.. أول ما جم كانوا بيقولوا: ابنك ازاي يقع في البلاعة؟ مفيش رجل بنى ممكن تدخل عند الماسورة وتعدى، ولما سلكو المجارى، ابنى مشى مسافة 7 كيلو لحدما وصل لمكان العثور على جثمانه».
تتحدث بنبرة ممتزجة بالغضب والحزن: «أنا عايزة حق ابني (سليم).. ده كان ابني الكبير، وصاحبي، وماعنديش غيره هو وأخته الصغيرة.. مش عارفة أعيش من غيره.. صُوره في كل مكان: في الموبايل، وفي البيت.. هو كان كل حياتي»، وتضيف: «قبل كده راجل وقع في نفس البلاعة ورجله اتكسرت، بس محدش تحرك.. كله سكت.. وإحنا النهارده بدفع تمن السكوت ده.. أنا بطالب بحق ابني، مش عايزة غير كده.. ابني مات بالإهمال، لا أكتر ولا أقل».
تفاصيل جديدة في مصرع الطفل داخل المجاري بشبرا الخيمة
جد الطفل الضحية، ناحية الأم، يستعيد تفاصيل الساعات الطويلة التي قضاها في البحث عن حفيده: «(سليم) كان بيلعب جنب العربية، قدام عينينا.. فجأة اختفى.. افتكرنا إنه اتخطف، بس لما دَوّرنا في كل حتة، ما لقيناهش.. بعد كده جت المباحث وناس من الصرف، ونزلوا الغطاسين.. كانوا بيشتغلوا كأنهم بيأدوا واجب مش أكتر.. وبعد 36 ساعة قالوا لقيناه».
يتوقف قليلًا، ثم يقول بصوتٍ غاضب: «حفيدى ضحية الإهمال.. البلاعة دي ماينفعش تكون مفتوحة كده، خصوصًا في شارع حيوى كله حركة رايحة وجاية.. اللي حصل ده جريمة، وعرفنا إن في كذا بلاعة كانت مفتوحة بلا غطاء في نفس المنطقة مش عايزين المأساة تتكرر وتحصل لحد غيرنا».
أما الجدة أم آدهم، تقول من وسط دموعها: «ده مش حفيدي اللي طلع.. شكله كان متغير خالص.. ولولا إن أبوه وأمه أصرّوا إنه هو، كنت قلت مش هو.. أنا شوفت الواد قبل ساعة من سقوطة في البلاعو، أكل بإيدي، وبعد 3 أيام شوفته جثة»، تكمل:«طلبنا الغطاسين من أول ساعة، قالولنا مفيش، كلهم في القاهرة.. والطفل فضل من الساعة واحدة بالليل لحد 3 ساعات، ولا حد نزل يدور عليه.. بعد ما عملنا شكوى في المحافظة جم، بس بعد ما كان خلاص».
ترفع رأسها وتنظر إلى صورة الحفيد المعلقة، تعاود كلامها مع بكاء متواصل:«جسمه كان منفوخ، ووشه كله دم.. اتعذب قبل ما يموت»، فيما كان الجيران يردد: «كلنا كنا بنحبه، ضحكته كانت ماليه الشارع».
النيابة تنتدب لجنة فنية لمعاينة موقع الحادث في شبرا الخيمة
باشرت النيابة العامة التحقيقات، وطلبت تحريات المباحث حول ظروف وملابسات الحادث، كما أمرت بإرسال الجثمان إلى الطب الشرعي لتشريحه وبيان سبب الوفاة والتأكد من وجود شبهة جنائية من عدمه.
واستمعت النيابة إلى أقوال والد الطفل ووالدته وعدد من شهود العيان، الذين أكدوا أن البالوعة ظلت مفتوحة منذ قرابة عام دون غطاء، رغم تقديم شكاوى متكررة من الأهالي إلى مسؤولي الصرف الصحي في الحي.
وطلبت النيابة استدعاء مسؤولي شركة الصرف الصحي بحي شرق شبرا الخيمة لسؤالهم عن سبب ترك البالوعة دون غطاء طوال تلك المدة، وقررت تحفظها على محضر المعاينة الفنية للموقع الذي أثبت وجود البالوعة في منتصف الشارع دون أي وسيلة تحذير أو حماية.
كما كلّفت النيابة لجنة فنية من المحافظة والصرف الصحي بمعاينة موقع الحادث وإعداد تقرير عاجل عن حالة البالوعات في المنطقة، ومدى التزام الجهة المختصة بإجراءات الأمان والسلامة العامة.
وأمرت النيابة كذلك بإرسال خطاب رسمي إلى شركة الصرف الصحي لاتخاذ الإجراءات اللازمة لتغطية البالوعات المكشوفة فورًا في نطاق بهتيم والمناطق المجاورة، حرصًا على سلامة المواطنين.