تشكيل الزمالك في الموسم الجديد.. غموض وأزمة في الظهيرين (تفاصيل)

تسيطر حالة من الغموض على جماهير القلعة البيضاء بخصوص خريطة قائمة نادي الزمالك وتشكيل الفريق الأبيض في الموسم الجديد، بعد ضم عدة صفقات جديدة ورحيل بعض الأسماء عن الفريق.
وعلق الإعلامي أحمد شوبير حارس مرمى الأهلي ومنتخب مصر السابق على تشكيل الزمالك في الموسم الجديد موضحا أن هناك غموض بشأن خريطة الصفقات الجديدة حتى الآن والراحلين، فضلًا عن وجود أزمة في مركزي الباك اليمين والباك الشمال أيضًا.
وقال أحمد شوبير: «بالنسبة لحراسة المرمى فيه محمد عواد والمهدي سليمان والحارس الشاب محمود الشناوي ومحمد صبحي لو قعد».
وأوضح شوبير: «الباك اليمين عمر جابر وهيضطر المدرب يانيك فيريرا إنه يحط مصطفى الزناري ظهير أيمن حال غياب جابر، أو ممكن يوظف حد تاني ناحية اليمين».
وتابع شوبير: «قلب الدفاع أحمد حسام هيترفع اسمه من القائمة بعد ما أصيب بالرباط الصليبي، أما حسام عبدالمجيد فضامن ماكنه في المساكين وهيكون جنبه محمود حمدي الونش أو صلاح مصدق هتبقى خناقة بينهم على المكان التاني، لو الونش سليم هيكون الأساسي جنب حسام عبدالمجيد وقد ينضم لهم محمد إسماعيل الوافد من زد».
وبخصوص مركز الظهير الأيسر، قال: «الباك الشمال أنا شخصيا مش عارف موقف أحمد فتوح أيه موقوف ولا بيتحقق معاه، هيمشي مش عارف، فتوح جنني أنا شخصيا وأكيد مجنن الناس في نادي الزمالك، وبالتالي هيكون عندنا محمود بنتايك وكده عندك مشكلة في الباكين شمال ويمين علشان مفيش غير عمر جابر وبنتايك».
وأضاف شوبير: «في وسط الملعب وأنت مغمض حط عبدالله السعيد وكمان حط محمد شحاتة وبعدين عندك نبيل عماد دونجا إذا لم يرحل ومحمود جهاد لو سليم هيكون مكسب كبير وأحمد ربيع الصفقة الجديدة، وده لاعيب جيد جدا وفيه سيف فاروق جعفر كمان، وعندك 2 بدلاء حلوين في صناعة اللعب أحمد حمدي وناصر ماهر».
وعلى الصعيد الهجومي أوضح: «في مركز رأس الحربة هيكون التونسي سيف الدين الجزيري لو استمر وناصر منسي طبعا هداف الفريق الموسم الماضي، وفيه كمان وعمرو ناصر وده لاعيب كويس قوي وافتكروا كلامي، وعمر فرج مش مكمل غالباً».
واختتم شوبير: «آدم كايد هيكون في الجناح اليمين وفيه حازم أسامة وأحمد الجفالي وفي الجناح الشمال النجم الجديد شيكو بانزا وأحمد شريف وفيه كلام على عبدالحميد على إنه على وشك يوقع لنادي الزمالك».
وتسائل شوبير في النهاية: «هل فيه نقاط ضعف في تشكيل الزمالك؟ لأ مفيش بس فيه قلة في لاعبي الدفاع في الظهيرين يمينا ويسارًا».