«ربنا سترها معاك كتير».. أحمد حسن يوجه رسالة نارية ل أحمد فتوح

وجه أحمد حسن نجم الكرة المصرية السابق، رسالة نارية إلى أحمد فتوح، لاعب الفريق الأول لكرة القدم بنادي الزمالك، بعد أزمته الأخيرة.
وقال أحمد حسن في تصريحات عبر قناة «دي إم سي»: «لاعب الكرة مينفعش يأخد كل حاجه من مال وشهرة وفلوس وسهر وفسح، لاعب الكرة عنده التزام وعنده انضباط.. لاعب الكرة رأس مال صحته وسلوكه والتزامه وأداؤه.. لما يكون عندك إجازة أعمل اللي أنت عايزة، أسهر وأخرج واتفسح، لكن لما تدخل معسكر لازم تلتزم وأنت مش أفضل من عبدالله السعيد وكل اللاعيبة الموجودة».
وأضاف: «فنصحتي ليك مش هتاخد كل حاجه لازم تحرم نفسك، والحفلة دي مش هي اللي هتبسطك، لكن هتبقى مبسوط أكتر وأنت بتحقق نجاحات ليك ولزمايلك».
وتابع: «كرة القدم لازم بيكون فيها حرمان، فالغريب إنك تسيب معسكرك وفرقتك وتقطع مسافة 5 ساعات علشان تروح تحضر حفلة».
وأكمل: «لاعب الكرة حياته في الملعب قصيرة، وأنت ربنا سترها معاك كتير وفي وقت من الأوقات البني آدم هو اللي بيأذي نفسه، وأنت تعرضت لكذا موقف خرجت منه ودي إشارات، ولاعب الكرة حياته هي الالتزام والانضباط».
وزاد: «ربنا وقف جنبك وأنت متى ستقف مع ناديك، ونفسك، وزملائك، أي الاستفادة من حفلة فيها مطرب كبير وبيغني، وأي الاستفادة من إنك تورط مجلس إدارة الزمالك بإنك تقول أنا عمي تعبان والناس تديك إذن وإذ فجأةً يلاقوك في حفلة».
واستطرد: «هل أنت داخل حفلة شايف نفسك متخفي والناس مش هتعرفك، فليه تأذي كل الناس اللي حواليك، ونادي الزمالك بيمر بظروف صعبة»
وأتم: «كلامي لأغلب اللاعيبة مش فتوح بس في ناس بتشقى وبتتعب ومبتأخدش 1% من اللي بتأخده أنت كلاعب كرة من شهرة ومال ومكانة، فحافظوا على النعمة اللي أنتوا فيها».
وكان أحمد فتوح أثار جدلا واسعًا خلال الساعات الماضية، بعدما حصل على إذن من الجهاز الفني للفريق خلال المعسكر بداعي زيارة عمه المريض، قبل أن يظهر في مقطع فيديو أثناء حضوره حفل المطرب راغب علامة في الساحل الشمالي، برفقة إمام عاشور لاعب النادي الأهلي.
وعلى خلفية هذا الموقف، قررت إدارة الزمالك توقيع عقوبة مالية على اللاعب، وإيقاف مستحقاته، وتحويله للتحقيق، بسبب ظهوره في مناسبة عامة دون الحصول على إذن مسبق، كما جاء في البيان.