والدة ضحية طالب ثانوى بسبب «رفض الغش»: «كان كاتب على الحيطة إنه هيبقى دكتور»

«كان بيعدّ الأيام.. مستني يخلص الثانوية ويبدأ يحضّر لكلية الطب، وكل ما نعدي قدامها يقول لي: (استني يا ماما، دي بتاعتي إن شاء الله)»، تقول والدة الطالب طه نشأت، وهي تنظر إلى صورته المعلّقة على الحائط، وتحتها مكتوب «الدكتور»، وابتسامته لم تزل معلّقة بين كتب المذاكرة وأدواته الدراسية داخل منزلهم في شبرا الخيمة.
تفاصيل الاعتداء على طه نشأت بعد انتهاء امتحانات الثانوية
«طه،» الطالب في الصف الثالث الثانوي شعبة علمي علوم، لم يتخيل أحد أن آخر يوم امتحانات سيتحوّل من مناسبة للاحتفال إلى بداية مأساة لا يعرف أحد كيف تنتهي.
«ابني خرج من الامتحان، فرحان، بيضحك مع زمايله وبيتصور.. وكان بيقول لي: (خلصت يا ماما، ادعي لي بس أجيب مجموع حلو.. وبعد نص ساعة، لقيته في الرعاية المركزة، كله دم، مضروب في صدره ودماغه)».
تبدأ الحكاية من أسبوعين، يوم الخميس، عندما وقعت مشادة بسيطة بين «طه» وأحد زملائه في المدرسة. «قال له في الامتحان: غشّني.. وطه رد عليه: لا، مش هاغش، ولو مش عاجبك استناني بره»، تروي الأم ل«المصرى اليوم» تفاصيل المشادة الأولى، التي لم تتصور أن تتحول إلى محاولة قتل.
تضيف الأم: «المشكلة إن الولد ده سلّم عليه بعدها عادي كأن مفيش حاجة، يعني يوم الخميس اللي بعده، لما طه راح يمتحن آخر مادة، قابله وسلم عليه ومشي.. ومكنش حد فينا يتخيل اللي كان بيجهّز له».
بعد انتهاء الامتحان، اصطف الطلاب أمام بوابة المدرسة كعادتهم، يحتفلون بانتهاء رحلة طويلة من التعب والضغط، «طه» كان من بينهم، يضحك، يصوّر، يخطط لصيفه بعد المذاكرة الطويلة.
طلاب يحتفلون بنهاية الامتحان.. وزميلهم يُطعن أمام أعينهم
«ابني كان واقف مع زمايله، بيفرحوا.. ماكانوش عارفين إن في ناس واقفة مستنياهم برا»، تحكي الأم، وقد تغير صوتها بين كل جملة وأخرى.
بحسب شهادة الأم، خرج الطالب المعتدي من اللجنة مبكرًا، بعد أن أنهى امتحانه قبل باقي زملائه، وخرج إلى الشارع.، هناك، كان ينتظره عدة شباب آخرين، «كانوا واقفين قدام المدرسة، معاهم أسلحة بيضاء.. أول ما طه خرج، هجّموا عليه، هو وواحد من زمايله، ضربوه قدّام الناس».
طعنة في الجنب الأيسر، أصابت الرئة، وتمزق في الشرايين، وجروح قطعية أخرى في الرأس، لم يتوقف الأمر عند هذا الحد، تقول والدة المجنى عليه: «كل ما يشرب حاجة يرجّع دم، والدكاترة قالوا في شرخ في الجمجمة كمان».
تضيف وهي تطالع ورقة كان «طه» قد لصقها على حائط غرفته قبل أيام من الامتحانات: «كتب بخط إيده (هابقى دكتور طه).. كان مؤمن بنفسه وبيجتهد.. إحنا ناس بسيطة، أبوه أرزقي، دايمًا يقول له: امشِ جنب الحيطة، بس واضح إن في ناس بتجي تهدم الحيطان على دماغ ولادنا».
والدة طالب ثانوي تناشد: ابني بيتنفّس بأجهزة واللي ضربه حر طليق
نُقل «طه» إلى مستشفى ناصر، في حالة حرجة، ودخل فورًا إلى غرفة العمليات، الأطباء قرروا التدخل الجراحي العاجل لإنقاذ حياته، «قعدوا معاه أكتر من 6 ساعات في العمليات.. ما عرفوش يطمنونا، قالوا بس استنوا ربنا يكرم»، تروي الأم.
حالة طالب الثانوية العامة لا تزال حرجة، وفقًا لتقارير المستشفى، يرقد في الرعاية المركزة منذ وقوع الحادث، تحت الملاحظة، و«كل شوية حرارته ترتفع، وكل ما يفتح عينه يعيط ويسألني: (أنا فين؟)».
المؤلم، تقول الأم، إن «طه» «ماكانش عدو لحد.. كان هادي وعلى حاله، وكل أصحابه بيحبوه.. حتى اللي ضربه كان بيكلّمه عادي، ويضحك معاه قبل الامتحان».
عن اللحظات الأولى بعد الحادث، تحكي الأم كيف علمت بالواقعة من أحد زملاء «طه»، «جالي تليفون بيقولي: ابنك مضروب.. جريت على المستشفى، كنت فاكرة خناقة عادية.. ماكنتش عارفة إن ابني بيموت».
وتستكمل وهي تضع يدها على قلبها: «ماكنتش عايزة أصدّق إن ابني اللي كان بيحلم بالجيش، واقف دلوقتي بين الأجهزة، بيتنفّس بصعوبة، وواخد 14 غرزة في جنبه وراسُه».
الأم، التي لم تغادر المستشفى منذ الحادث، تناشد الجهات الأمنية بسرعة القبض على المتورطين في الاعتداء على ابنها. «فيه ناس وقفت مع اللي ضربه، وفيه سكاكين، وفيه نية للغدر.. دي مش خناقة، ده كمين».
تضيف وهي تنظر في الفراغ: «أنا ابني لسه ما احتفلش بنهاية امتحاناته، ولسه ما شافش نتيجة تعبه، ولسه ما دخلش الكلية اللي كان بيحلم بيها.. أنا مش عايزه غير حقه.. واللي حاول يموّته لازم يتحاسب».
وفي بيت الأسرة المتواضع بمنطقة القطاوي بشبرا الخيمة، لا تزال كتبه على المكتب، وملف التنسيق على الكومودينو، وخريطة ألوان معلقة على الحائط: «كان بيحب الكيماء.. وكان بيذاكر لها بالساعات»، تقول الأم بابتسامة حزينة.