هاني نجل حسن الأسمر يكشف تفاصيل أغنية «أغلى من عينيا»: سجلها من 17 سنة قبل وفاته

كشف المطرب هاني الأسمر، نجل الفنان الراحل حسن الأسمر، كواليس عودة صوت والده من خلال أغنية جديدة بعنوان «أغلى من عينيا»، وذلك بعد وفاته ب 14 عامًا، مشيرا إلى أن الاغنية تم تسجيلها قبل 17 عاما، حيث سجلها قبل وفاته ب3 سنوات.
وقال «هاني» في تصريحات ل «المصري اليوم»: «كل سنة وكل الجمهور طيبين ويارب أيامكم كلها فرح وخير وسعادة، الأغنية معمولة ومتسجلة بقالها أكتر من 17 عام وهي من كلمات الشاعر أحمد شتا وألحان الملحن محمود خيامي وتوزيع المايسترو ياسر ماجد هندسة صوّت المهندس مصطفى رؤوف وطبعا دي حاجة من الحاجات الحلوة أوي».
وأضاف: «يارب الاغنية تعجب الناس ودي اهم حاجة، احنا عملنا اغنية قبل كدا بعنوان صياد لم الشبك يا ابني كانت أول أغنية كانت ديو، دلوقتي انا بستخدم ال AI أو الذكاء الاصطناعي، وطبعا ال AI دلوقتي عظماء العالم كله بيستخدموه بس انا بحاول اطلع انسرتات حاجات لطيفه اكيد مش هعمل دا عشان حاجه معينه مثلا مش عشان عايز تريند أو غيره».
وتابع :«حسن الاسمر في قلب محبينه إلى بيحبوه وهو وحشهم فحبيت اقولهم حبيبكم اهو ال انتو بتحبوه، وانا بصور الأغنية وشغالة ف ودني حاسس انه موجود لان وقت مسجلنا الاغنية انا كنت موجود وحاسس بوجوده، انا اوقات بقعد اشغلها في العربيه وافتكر اللحظات ال كانت موجوده هيا لوحدها تحزن»
وأختتم :«انا عايز اقولك انا بعمل الذكاء الاصطناعي ال AI بركز في كل تفصيلة وصورة هوا فيها وارجاعها ممكن نقعد 5 أو 6 أيام متواصل لانها في الاول والاخر حاجه في وشي مينفعش اطلع حاجه وحشه، وحسن الاسمر مدرسة وتاريخ رحمة الله عليه، بالنسبة للانتقادات الكمال لله وحده أي حد هينتقد عملت حلو أو وحش هتنتقد».
يعود صوت المطرب الشعبي الراحل حسن الأسمر ليطل من جديد على جمهوره، بعد مرور 14 عامًا على وفاته، من خلال أغنية جديدة تحمل عنوان «أغلى من عينيا». هذه الأغنية هي ثمرة تعاون فني يجمع بين حسن الأسمر ونجله المطرب هاني الأسمر.
يذكر أن الأغنية من كلمات أحمد شتا وألحان محمود الخيامي وتوزيع ياسر ماجد ومهندس صوت مصطفى رؤوف وإنتاج محمد العشري.
وتعد «أغلى من عينيا» التعاون الثاني الذي يجمع الراحل حسن الأسمر ونجله هاني، حيث تعاونا سابقًا في أغنية «صياد» التي حققت نجاحًا كبيرًا.