موظفة أمام محكمة الأسرة: «عاندت أهلي عشان جوزي ولسه بدفع تمن عنادي طوال 13 سنة»

أقامت سيدة موظفة، 41 عامًا، دعوى طلاق للضرر ضد زوجها بدون عمل، 40 عامًا، بعد زواج استمر بينهما لمدة 13 عامًا، ورُزقا خلاله ب 3 بنات؛ لاستحالة العيش معه، وفقًا لما قالته السيدة في صحيفة دعواها.
اقرأ أيضًا: زوج أمام محكمة الأسرة: «سليطة اللسان والحياة معاها صعبة»
الزوجة: «أصريت عليه رغم رفض أهلي ورأيهم كان الصح»
وحكت المُدعية أمام محكمة الأسرة خلال نظر دعوى طلاق للضرر: «اتجوزته من 13 سنة، بعد ما اتحديت أهلي عشانه، هو كان متجوز قبل مني ومعاه طفلين من مراته الأولى، وكمان أصغر مني بسنة، وأهلي كانوا رافضين الجوازة من بدايتها، ولكن أنا أصريت عليه، وما سمعتش كلامهم، والنتيجة إني بدفع تمن عنادي طوال السنين إللي فاتت».
اقرأ ايضًا: موظف أمام محكمة الأسرة: «مش قادرة تسامحني على غلطة عملتها من 17 سنة»
المُدعية: «عايش عالة عليا وأنا إللي بصرف على البيت»
وأضافت الزوجة :«جوزي شخص مهمل ويتنصل من المسؤولية، ما بيحبش يشتغل، وأنا إللي بصرف على البيت وبناتي التلاتة، الحمد لله ربنا رزقني بوظيفة كويسة، وهو بيستغل ده وما بيرضاش يدور على شغل عشان نفسه حتى، بل عايزني أدليه مصروف كمان».
اقرأ أيضًا: سيدة أمام محكمة الأسرة: «جوزي كان شغال عند والدي في المصنع وبعد ما اغتنى غدر بيا»
السيدة: «بيضربني عشان ياخد فلوسي»
وأكملت المُدعية أمام محكمة الأسرة: «اتكلمت معاه كتير عشان الوضع بقا صعب ومصاريف البنات بقت كتير عليا، ولكن كلامي معاه من غير نتيجة، بقا يتطاول عليا ويتعدى بالضرب من وقت للتاني؛ عشان مابرضاش أديله فلوس، والشهور الأخيرة بينا كانت صعبة عليا، بقا يقولى ألفاظ سيئة ويضربني بقوة، عشان بصرفها كلها على أكل بناتي وتعليمهم، ومارضتش أديله أي فلوس تاني، فقررت أرفع دعوى طلاق للضرر؛ عشان أخلص من غلطة عملتها من 13 سنة وهي إني وقفت معاه ضد أهلي»، وحكمت محكمة الأسرة بطلاق السيدة من زوجها بعد 4 جلسات من إصرار المُدعية على الطلاق.