ناقد فني عن تراجع شعبية مسلسلات محمد سامي: الجمهور زهق من تكرار التيمات

كشف الناقد الفني أندرو محسن عن أسباب تراجع شعبية مسلسلات المخرج محمد سامي، في موسم دراما رمضان 2025، مؤكدًا المسلسلات التي ينافس بها هذا العام لم تحقق نفس الصدى الذي حققته مسلسلاته في الأعوام السابقة.
وكتب أندرو محسن عبر حاسبه على «فيس بوك»: «أعتقد إن السنادي فيه تراجع واضح لشعبية مسلسلات محمد سامي، والسبب مش غياب محمد رمضان، لأنه السنة اللي فاتت نجح مع مي عمر بمسلسل نعمة الأفوكاتو. مابقولش إن المسلسلين السنادي فشلوا لكن مالهمش نفس الصدى ولا بيحتلوا المراكز التلاتة الأولى على شاهد، لحد آخر مرة شفت كان إش إش الرابع وسيد الناس الخامس، وبالتأكيد مافيش لمة القهاوي اللي كانت بتحصل على جعفر العمدة».
تابع: «أعتقد إن الجمهور -زي ما بيحصل دايمًا- زهق. تكرار تيمات بعينها وشكل معين للأداء والحوارات، خلى الجمهور يمل من التكرار ده. خاصة مع وجود منافسة قوية سواء في نفس المنطقة زي العتاولة مثلا اللي ممكن يكون»ملون«أكتر وفيه نفس الأجواء الشعبية من غير الميلودراما الفاقعة والتمثيل المبالغ فيه جدًا، أو منافسة في أنواع مختلفة من المسلسلات».
أوضح: «ببساطة شديدة من الحلقة الأولى لسيد الناس وإش إش ممكن استنتاج أغلب تفاصيل الحبكة، وده لأن الشخصيات بتطلع تقول ده بكل وضوح أولًا ولأن الشكل ده احنا شفنا زيه بالظبط في مسلسلات سامي السابقة، فلما ده يتحط كمان مع أداء متواضع أو أقل في المسلسلين، إلا في استثنائات بسيطة، يبقى طبيعي المشاهد يختار حاجات تانيه يشوفها».
اقرأ أيضًا:
«لازم تعوجي بقك عشان تبقي شريرة».. كيف ردت إلهام شاهين على انتقاد متابعة لأداءها في «سيد الناس»؟