«اعرفوا القوانين شوية».. شوبير يوجه رسالة نارية للزمالك بعد غرامات «الكاف»

علق الإعلامي أحمد شوبير، على قرار لجنة الانضباط بالاتحاد الأفريقي لكرة القدم «كاف»، بتوقيع غرامة مالية 300 ألف دولار على نادي الزمالك بسبب التهديد بالانسحاب من السوبر الأفريقي أمام الأهلي، إلى جانب إيقاف شيكابالا وناصر منسي ثنائي الفريق 3 مباريات وتغريمهما 10 ألاف دولار.
وقال شوبير في تصريحات إذاعية اليوم الأحد: «أرجوكم محدش يزعل مني، وخدوا الكلام بقلب مفتوح متاخدهوش بأهلي وزمالك، والكلام اللي إحنا شطار جد في ده، لو عايزين نصلح يعني. امبارح لجنة الانضباط في الكاف أصدرت غرامات تقيلة وشديدة على نادي الزمالك، والناس بتقوي إن اتحاد العاصمة الجزائري لما انسحب من نصف نهائي الكونفدرالية، اتغرم 40 ألف دولار بس».
وأضاف: «أولا لازم نكون أقوية شوية في هذه اللجان، ثانيا لازم بردو نعرف الصح من الغلط، عشان منقعش في المحظور وتحصلنا المشاكل اللي بتحصل دي، الإيقاف لناصر منسي 3 مباريات عشان خالف المادة 147 من قانون الانضباط وتم تغريمه 10 ألاف دولار عشان إشارة الذبح».
وتابع شوبير: «يا جماعة يا لاعبتنا افهموا شوية واعرفوا القوانين شوية، ذنب نادي الزمالك ايه يتخصمله 300 ألف دولار، وإيقاف 2 لاعيبه، وده لانهم سايبين الحبل عالغارب أي حد يقول هنسحب ومش هلعب وتهديد، ومين يقعد ومين يتكلم معاهم وشغلانة، يا جماعة حطوا نظام وأساس عشان الدنيا تمشي صح».
وأتم: «الناس في الزمالك قالوا هنقدم التماس، مستنين الالتماس ورد الفعل على الالتماس، بس من فضلكوا اشتغلوا المرادي صح، مش عايزين مشاكل أكتر من كده الله يخليكم، الناس بتتعذب».