شوبير يوجه رسالة قوية ل الخطيب وحسين لبيب بشأن دعاة الفتنة بين الأهلي والزمالك

وجه الإعلامي أحمد شوبير حارس مرمى الأهلي ومنتخب مصر السابق رسالة قوية إلى الثنائي محمود الخطيب رئيس النادي الأهلي وحسين لبيب رئيس نادي الزمالك بشأن التهدئة بين الناديين وعدم الاستجابة لدعاة الفتنة بين القطبين.
وقال أحمد شوبير: «مصدر مسؤول داخل النادي الأهلي، قلت له هتعملوا أيه في زيارة نادي الزمالك فقال لي إن وفد برئاسة كابتن محمود الخطيب هيروح يبارك لمجلس الزمالك الجديد، وكمان قال لي إن الأهلي حاليًا منتظر عودة الكابتن محمود الخطيب لزيارة الزمالك».
وتابع أحمد شوبير: «في حالة رضا وحالة ارتياح للوضع حالياً بين الناديين والحقيقة كمان الأهلي لما أرسل بوكيه ورد لمجلس الزمالك الجديد برئاسة حسين لبيب ما اتبعتش بالبريد ولكن مدير أمن النادي الأهلي راح بيه على نادي الزمالك كنوع من انواع التقدير الحلو اللي احنا كنا مفتقدينه في الفترة اللي فاتت».
وأضاف شوبير: «في المقابل في نادي الزمالك مستنيين خطوة النادي الأهلي وهما للأمانة عملوا اللي عليهم وأدينا شايفين الناس قدامنا بتموت فاحنا في حاجة ماسة لإشاعة الهدوء والاحترام في الوسط الرياضي، عشان لما نعمل مبادرة الدنيا تمشي كويسة».
وأوضح شوبير: «لكن المشكلة في السوشيال ميديا تلاقي اللي يقول لك من جماهير الزمالك لأ احنا مش هنستقبل مجلس الأهلي أوعى تنسى يا حسين يا لبيب لما مجلس الأهلي سخر قبل كده من برقية التهنئة وسحبها بعد كده».
ورد شوبير بقوة: «أنتوا مين أساسا وأنتوا عايزين ايه مش فاهم عايزن الحرب تفضل شغالة والدنيا مشتعلة ما تتاخروا شوية وتخلوا الدنيا تمشي كويس ونعيش الحياة بكل محترم، والكابتن عدلي القيعي وده راجل مسؤول في الأهلي رئيس شركة الكرة طلع امبارح وقال الزيارة دي لازم تتم اساسا، وبالتالي ده أمر محترم».
وأضاف شوبير: «أتمنى لا الكابتن محمود الخطيب ولا الكابتن حسين لبيب يستمعوا لدعاة الفتنة على السوشيال ميديا».