لاعب الزمالك السابق ل مجلس الأبيض: مقعد زيزو ليه.. وبن شرقي لو الأهلي شاورله هيمضي ببلاش

وجه لاعب نادي الزمالك السابق، رضا العزب، رسالة إلى مجلس إدارة القلعة البيضاء، تضمنت بيع أحمد سيد زيزو نجم الزمالك في الميركاتو الصيفي الجاري، لحل المشاكل والأزمات المالية المتعلقة بالفريق.
وقال لاعب الزمالك السابق، في تصريحات تليفزيونية عبر شاشة النهار: «مقعد زيزو ليه في الزمالك، متسيبوا يمشي وبيعه، عشان تعرف تحل الأزمات، أنت ولا عارف تفك القيد، ولا تجيب لعيبة، زيزو السنة الجاية هيتم ال30 سنة تقريبًا ومش هتقدر تبيعه بالمبلغ الخرافي ده».
واستمر رضا العزب: «إدارة الزمالك خايفة من أية، ما الجمهور لما يشوفك جبت 5 أو 6 لعيبة بعد متبيع زيزو هيسكت وهيبقى مبسوط وهيشيد بيك».
وزاد: «لحد دلوقتي مفيش ولا صفقة، ولا هيبقى فيه طول مانت صابب كل تركيزك على لاعب واحد اللي هو أشرف بن شرقي ومدوخك وراه، والله مصطفى شلبي حاليًا قده 100 مرة، بن شرقي بقالي 3 سنين معرفش عنه حاجة».
وأكمل: «بن شرقي لو في مستواه مكنش مشي من الدوري الإماراتي والدوري القطري، ربنا عرفوه بالعقل، الإدارة عايزة تجيبه عشان يبقى مسكن للجماهير، بس مينفعش نادي بكيان الزمالك يفاوض لعيب واحد».
وزاد لاعب الزمالك السابق: «اللعيبة اللي موجودة مينفعش تلبس تي شيرت الزمالك، وانت مفروض كمجلس إدارة عارف من قبل ما تيجي أن في مشاكل بالنادي، مش هيقدره يجيبوا لعيبه سوبر آخرهم لعيبه فرز تاني وتالت».
وأتم: «بن شرقي مخلي الزمالك آخر محطة، ولو النادي الأهلي شاورله هيمضي ببلاش، بس الأهلي مش هيجيبه عشان عنده لعيبه أحسن منه 100 مرة».