«لسه فاكرين دلوقت».. رسائل نارية من إبراهيم سعيد ل مجلس الزمالك بعد عزاء فقيد حادث أحمد فتوح

انتقد إبراهيم سعيد نجم النادي الأهلي ومنتخب مصر السابق، تأخر نادي الزمالك في تقديم واجب العزاء ل أسرة المتوفي في حادث أحمد فتوح لاعب الفارس الأبيض.
وقال إبراهيم سعيد في تصريحات تليفزيونية عبر برنامجه «بلس 90» المذاع على شاشة النهار: «الحادثة بقالها أسبوع، الزمالك لسة فاكر دلوقتي أنه يقدم واجب العزاء وبتنزل نعي النهاردة، يعني ده شيء غريب جدًا، والله مفروض نادي الزمالك ده اسم كبير جدًا».
وأضاف نجم الأهلي السابق: «مصر كلها نزلت نعي وقدمت واجب العزاء، وأنت كنادي الزمالك لسه فاكر النهاردة، لسة واصلككو دلوقتي أن في حادثة وكارثة، الموضوع من احتواء موقف أحمد فتوح، دي مفروض شيء إنساني وواجب لابد من تقديمه».
وأكمل: «لسه متذكر مشجعتين النادي الأهلي اللي توفاهم الله في حادث برج العرب، المسؤولين ومجلس الإدارة تاني يوم الصبح كانوا في العزاء والدفن ومتواجدين مع الأسرة، أنتو بقى يا إدارة الزمالك للدرجادي مشغولين عشان متروحوش، الطبيعي بدل متقعد على كرسي، كنت بعت النعي من بدري ويروح مجلس الإدارة برئاسة حسين لبيب حتى لو مفيش دية».
وزاد إبراهيم سعيد: «حتى كمان اللعيبة مفروض يروحوا يقدموا واجب العزاء، ده الدور المجتمعي اللي المفروض يقوم بيه كيان زي النادي الزمالك، العزاء مفروض 3 أيام، النهاردة عدينا أسبوع لسه فاكرين».
وأردف: «هل ده ينفع من مسؤولين لنادي الزمالك، أنهم لسه فاكرين دلوقتي، كلنا حزنا على الفقيد الذي توفاه الله، مش عارف أية سر التردد والتأخير ده كله مهما كان الموقف صعب».
وأتم: «أتمنى من متحدث نادي الزمالك أحمد سالم، أنه ميتكلمش كتير ويكون ليه وقت معين يتكلم فيه مش عمال على بطال، عشان تصريحاته مينفعش تطلع من حد مسؤول».