«احترم حب جمهور الزمالك ليك واعتزل».. إبراهيم سعيد يفتح النار على شيكابالا

وجه إبراهيم سعيد، نجم الأهلي والزمالك ومنتخب مصر السابق، رسائل نارية إلى محمود عبدالرازق «شيكابالا»، قائد الفريق الأول لكرة القدم بنادي الزمالك، بعد المستوى الذي ظهر عليه في مباراة المقاولون العرب.
وقال إبراهيم سعيد، في تصريحات تلفزيونية عبر فضائية «النهار»: «أنا اتفرجت على مباراة الزمالك والمقاولون العرب، وموضوع عامل السن فارق مع شيكابالا، وواضح جدًا، هل ده مستوى شيكابالا؟ مش ممكن فارق شاسع في مستواه حاليًا ومستواه قبل كده».
وأضاف: «أتا اتفرجت على شيكابالا، في مباراة الزمالك والمقاولون العرب، هو واخد مربع واقف فيه وبيعمل الكورة بين رجل اللعيب، الكلام ده مش مفيد للفريق بدليل إن الزمالك خسر».
وتابع: «شيكابالا، بعيد جدًا عن مستواه، في كورة حاول بجري بيها، محمد عنتر لاعب المقاولون، جري وراه سبقه وقطع الكورة منه»، مضيفًا: «الزمالك ممكن يستغل شيكابالا، في الجهاز الفني، خاصة أنه قريب من اللاعبين والفريق لن يستفيد منه داخل الملعب سواء كلاعب أساسي أو لاعب احتياطي».
وواصل: «هل شيكابالا، عايز يوصل لمرحلة إن الجمهور يقوله خلاص؟ أصعب حاجة في الكورة إن الجمهور إللي بيحبك يقولك كفاية».
وأكمل: «مفروض شيكابالا، يحترم حب جمهور الزمالك ليه، لأنها لو جت من الجمهور وقاله اعتزل هتبقى صعبة أوي، حتى لو الجماهير بتحبك هتبتدي تقلب عليك وحصل الكلام ده مع حازم إمام وهو مش ناسي الموقف ده لحد دلوقتي».
وأتم: «إنت لو بتحب الزمالك اقعد مع مجلس الإدارة وقولهم خلاص أنا مش قادر أكمل لمصلحة النادي لأن وجودك مش مفيد».