ياسمين عز توجه رسالة للآنسات والمتزوجات: «الحلقة دي للكبار فقط» (فيديو)

خصصت الإعلامية ياسمين عز، حلقة برنامجها اليوم الجمعة عن الطلاق، مشيرة إلى التغيير الكبير في سلوك السيدات بعد الطلاق مقارنة بأزمنة سابقة.
وقالت عز، خلال برنامجها «كلام الناس»، عبر فضائية «mbc مصر»، اليوم الجمعة: «الست زمان كانت تتطلق تقعد تبكي على أطلال 40 يوم، دلوقتي الست تطلق تروح تعمل شعرها هايلايتس وتنزل تحضر أول فرح يقابلها».
وأضافت: «الزوج والزوجة في البدايات تلاقيهم بيرققوا أوي في صوتهم، ويقربوا من صوت النجمة الكبيرة ماجدة الصباحي، لكن بعد كده كل واحد فيهم بيطلع قدرات صوتية جبارة تقعد أحسن مغني أوبرا في بيته، بتسمع في البيوت سيمفونيات بحيرة البجع، وطبيعي العلاقات دي تنتهي بالطلاق».
إتيكيت معاملة الطليق
وتابعت «عز»: «في حاجة اسمها إتيكيت معاملة الطليق زي ما في حاجة اسمها إتيكيت معاملة الزوج، هنا أنا بكلم المدام مش الآنسة، فبلاش ألاقي الآنسات والقاصرات أم 15 سنة، أمهات نص لسان بيعلقوا على كلامي، انتوا مالكوش علاقة بالموضوع ده، ولا الحلقة، الحلقة دي للكبار فقط، والمتزوجات برضو ممكن متعلقوش على كلامي».
وأكملت: «لو انتي كنت محجبة واتطلقتي مينفعش تقابلي طليقك والأصة طالة من الطرحة، أو تتهوري وتقصي شعرك أو تصبغيه أصفر، نفسيتك مش هتتغير، فتلة شعرك هي اللي هتتغير، نحافظ على شعرنا هو اللي باقي لنا».
واستطردت: «ممنوع إرسال لوم وعتاب ورسائل طويلة ومملة، غيَّري اسمه في الهاتف بأي اسم تاني، وممنوع تشيلي صورتك من فيسبوك، وتحطي مكانها حسبي الله ونعم الوكيل، وما تجيبيش سيرته بكلمة وحشة مع الأبناء، وممنوع تُقفي في طريقه؛ لو عايز يتجوز تاني».