لأول مرة.. على معلول يكشف تطورات تمديد تعاقده مع الأهلي

كشف الدولي التونسي على معلول ظهير أيسر الفريق الكروي الأول بالنادي الأهلي تطورات تمديد عقده داخل النادي الأهلي وبرنامجه العلاجي في الفترة الحالية في ظل الإصابة القوية التي يعاني منها في وتر أكيليس.
وقال الإعلامي أحمد شوبير في تصريحات إذاعية صباح اليوم الخميس: «جمعتني مكالمة مع على معلول قلت أيه أخبارك قال لي تمام وبخير واللاعبين كل يوم معايا وزي الفل، شوية لقينا قلق وكلام كثير إن معلول مسافر مسافر فقلت له يا على انت مسافر قال لي أنا مكمل في مصر وهتعالج هنا ولو لقيت حاجة تتطلب العلاج بره ممكن أسافر لكني قررت أكمل علاجي هنا ومش هضيع وقت».
وتابع شوبير، رحت بعد كده لموضوع تجديد العقد وقلت لمعلول: «طيب الدنيا في النادي معاك أيه قال الأهلي مش مقصر معايا في حاجة لا من قريب ولا من بعيد قايمين بالواجب وزيادة، وبشكر الأهلي جدا والكابتن الخطيب قال لي اللي أنت عايزه يا على في تجديد عقدك هيتعمل».
واختتم شوبير مستنكرًا كثرة الإشاعات في الأيام الماضية حول رحيل على معلول وعدم رغبة الأهلي في تجدد عقده: «بس أنا مش عارف يا جماعة كل شوية داخلين في قصة على هيمشي والأهلي مش هيجدد له وحكاية وحدودتة فمش عارف ليه الكلام الكثير، أديني قلت لكم كلام الناس في النادي وكلام على فبلاش نكلم في الموضوع ده تاني وياريت نقفله».
واختتم شوبير: «يا جماعة معلول عنده إضابة دمها ثقيل ومحتاج إن أحنا نساعده ونقف جنبه أرجوكم ده يحصل يعني».