«كنت بشجع الزمالك في أفريقيا».. شوبير يعلق على أزمة شقيق زوجة إمام عاشور

شن الإعلامي أحمد شوبير حارس مرمى الأهلي ومنتخب مصر السابق هجوما عنيفا على منتقدي شقيق زوجة إمام عاشور لاعب الزمالك الشاب ياسين حافظ بسبب تهنئته لنجم الأهلي على المستوى الرائع الذي يظهر به مع الأهلي في الفترة الماضية.
وقال أحمد شوبير في تصريحات إذاعية صباح اليوم الإثنين: «عايز أفتح قضية مهمة جدا واحنا واخدين الموضوع بهزار يعني كلمتين والسلام، لأ ما ينفعش الامور لازم نبقى محترفين، ولسه بنلاقي ناس تقول اللاعيب دي أهلاوي وده زملكاوي، وبقالنا شهرين بنتكلم إمام عاشور ومش عارف أيه شاهد مباراة الزمالك ضد فيوتشر في أفريقيا».
وتايع شوبير: «أقول لكم حاجة أنا كنت بشجع الزمالك في البطولات الافريقية اللي عايز يصدق يصدق واللي مش عايز إن شاء الله مصدق لكن في الدوري طبعا مكنتش بشجعه عشان ده منافس هنا لفريقي اللي بلعب له النادي الأهلي».
وتابع شوبير: «عايز أقف عند موقف أثار الجدل وهو خاص بلاعب الزمالك الشاب ياسين حافظ اخو مرات إمام عاشور، الولد نشر صورة هنأ فيها إمام عاشور وقال أحسن لاعيب في افريقيا، وفيها أيه ما لاعيبة الأهلي بتنشر صور لاعبي الزمالك وتتغزل فيهم خاصة كمان لما لاعب يصاب زمايله من النادي التاني بينشروا صورته ويدعموه».
وأوضح شوبير: «قامت بعض جماهير الزمالك هاجموا الولد بشكل قوي، يا جماعة دول نسايب، يعني نسايب قرايب قرايب نسايب، فيها أيه يعني ده أنا عرفت إن عدد كبير من لاعبي الأندية الاخرى زاروا على معلول في المستشفى واطمنوا عليه، لكن بعض الجماهير ترفض ده وشايفاه مشكلة كبير».