«كلمة أساطير اتبهدلت».. رد ناري من إبراهيم سعيد على أيمن يونس بشأن نجم الزمالك

رد إبراهيم سعيد مدافع منتخب مصر والنادي الأهلي السابق بشكل ناري على نجم الزمالك السابق أيمن يونس بعد تصريحاته عن مدافع الفريق الكروي الأول بنادي الزمالك حسام عبدالمجيد.
وقال إبراهيم سعيد في تصريحات مساء اليوم عبر قناة النهار: «كابتن أيمن يونس طلع في تصريحات قال إن حسام عبدالمجيد يملك جينات أساطير الليبرو ووحش الدفاع وملك صناعة بداية الهجمات.. كلمة أساطير أتبهدلت قوي الفترة دي، اه والله بجد اتبهدلت عشان الفترة اللي فاتت بقت منتشرة أكثر ما بنكلم في الكورة».
اقرأ أيضًا: «أبوتريكة قعد احتياطي».. رسالة نارية من إبراهيم سعيد لمحمد الشناوي
وانتقد إبراهيم سعيد حسام عبدالمجيد موضحًا: «حسام معلش يعني أولا بطيء لعبه بطيء في الكور العالية ماشي هو طويل وزي الفل إنما كورة ومهارة عنده مشاكل غير عادية عنده بطء غير طبيعي وتركيزه قليل جدا».
وتابع إبراهيم سعيد: «الكلام ده يتقال على كابتن هاني رمزي كابتن وائل جمعة يتقال على اللعيبة دي ممكن كاتبن هاني سعيد انما انتوا ليه دائما بتأفوروا كده في التصريحات، ما أقول إنه لاعيب كويس وعايز يشتغل على نفسه عشان يبقى حاجة أفضل».
وأضاف إبراهيم سعيد: «حتى في المهارة حسام مش اللعيب اللي تعتمد عليه، الكلام ده تقوله على لاعيب كورة تقوله مثلا على إمام عاشور بيدافع بيهاجم، أنت ممكن عايز يا كابتن أيمن ترفع معنوياته بس بالعقل بتقولوا تصريحات تنفخ في اللعيب وهو امكانياته محدودة، كلامك ده تقوله على لاعيب عنده مهارات خاصة إن انت كنت لاعيب كورة كويس جدا فما تقوللش الكلام ده».
واختتم إبراهيم سعيد: «مش أي حاجة نقول عليها أساطير الكلمة دي نغمة دلوقتي منتشرة، اه شجع لاعيبتك بس أدي كل لاعيب قد إمكانياته، يا كابتن ده لولا مشكلة القيد كان زمان حسام عبدالمجيد بره نادي الزمالك».