عمرو سلامة ل محمد سلام: «الطرف الآخر اتسعمل الفن في التحكم في السردية العالمية»

علق المخرج عمرو سلامة، على الجدل المثار حاليا داخل الوسط الفني، وذلك بعد تباين آراء عدد من الفنانين حول موقف الفنان محمد سلام واعتذاره عن تقديم مسرحية «زواج اصطناعي»، واستبداله بالفنان محمد أنور لعرضها غدا بموسم الرياض.
وقال «سلامة» عبر «تويتر»:«السينما مش أجور مستفزة لفنانين وفستان على سجادة حمرا، الطرف الآخر انتصر وبينتصر وكسب تعاطف العالم لإنه تحكم في السردية العالمية، تحكم فيها بالفن أولا وثانيا وثالثا، الفن اللي أغرقه بقصصه وحكاياته، وقدر بيهم يتحكم في وعي العالم كله، وبعد الفن استخدم إعلام وسياسة وسلاح ورأس مال، بس كان وسيلته الأهم الفن»
وأضاف :«السينما والفن صناعة، 10 في المية من العاملين فيها بياخدوا أجور عالية نسبيا آه،ولكن 90٪ من العاملين فيها ناس بتجري على أكل عيشها وعايشة بالكاد، لو توقف الفن الناس ديه هتجوع مش هتدفع أقساطها ومش هتاكل عيالها».
وتابع :«ماينفعش تروح لراجل في مصلحة حكومية وتقوله امضي لي ورقة فيقولك مش قادر بسبب أحداث سياسية دموية مأثرة عليا، ماينفعش تقول لميكانيكي صلحلي العربية يقولك مش قادر صور الدمار مأثرة فيها، هو آه إسمه ترفيه بس هو صناعة، طالما مانتاش ماسك سلاح بتحارب العدو في أرض المعركة دورك تشتغل وتعمل دورك في المجتمع، لان ده اكل عيشك واكل عيش ناس كثير غيرك».
واستطرد :«متفهم جدا اكتئاب أي فنان أو إنسان، وأحترم كل المواقف الشجاعة، ولو عند أي حد رفاهية عدم الشغل وهو مكتئب هيبقى مفيد يريح ويهتم بصحته النفسية، لكني أشعر بس كمان إن علنية المواقف ممكن تئذي ناس كثير غيره وتحط عليهم ضغط لا يستحقوه، وكل خوفي يكون الفنان نفسه مش مقدر فنه، وعنده صوت داخلي جواه مستهيف الفن أو مستحرمه أو مستحقره، لإن لو الفنان نفسه شايف الفن كده فده يبرر ليه شريحة كبيرة من الناس شايفه الفن كده، رقص وهلس وعري وفلوس ع الأرض وشكرا».
وأختتم :«الفن في رأيي عمل زي أي عمل، ويضاف عليه إنه قادر على تشكيل وعي البشرية، قادر إنه يطبب عليهم في وقت صعب، قادر إنه يخلينا كإنسانية نفهم بعض أكثر،أنا كلامي أقسم بالله مش نيته مهاجمة حد -خصوصا لو حد بحبه- ولا الدفاع عن حد، هو دفاع عن مهنة فاتحة بيتي، ومهنة بتعطيني سبب للحياة، ومهنة أنا في منظوري شايفها نبيلة، ولو ماكنتش شايفها كده ماكنتش هشتغلها».
محمد سلام يثير عاصفة جدل بسبب حديثه عن موسم الرياض والعدوان على غزة
أثار الفنان محمد سلام عاصفة جدل خلال الساعات الماضية، بعدما اعتذر عن المشاركة في مسرحية «زواج اصطناعي» ضمن فعاليات موسم الرياض بالسعودية، تضامنًا مع الفلسطينيين الذين يعيشون كارثة إنسانية خاصة في قطاع غزة.
وأثار قرار محمد سلام انقساما حادا في الوسط الفني في مصر، بين مؤيد ومعارض، إذ أيده كثيرون في إبداء التعاطف وإظهار كامل الدعم لأهالي غزة، بينما انتقده آخرون بسبب ما اعتبره «مزايدة على صناع القرار في السعودية والقائمين على موسم الرياض».
اعتذار محمد سلام عن مسرحية «زواج اصطناعي»
كشف محمد سلام عن تفاصيل هذا الأمر في فيديو له على انستجرام قائلًا: «السلام عليكم ورحمة الله إن شاء الله المفروض أسافر الرياض عشان أعرض مسرحية زواج اصطناعي في موسم الرياض والمفروض إنها مسرحية كوميدية وفيها أغاني واستعراضات والمفروض إننا نعرض إن شاء الله يوم 30 أكتوبر».
وتابع محمد سلام: «هنعرض في وسط الأحداث اللي بتحصل في غزة، فأنا مش متخيل إني هروح أعمل مسرحية وأهزر وأرقص وإخواتنا في فلسطين عمالين يتقتلوا ويدبحوا ومفيش حاجة بتحصلهم».
وأوضح: «أنا مش هقدر أسافر طبعًا وليه بقول الكلام ده في آخر لحظة المفروض إني أسافر بكرة إن شاء الله لأني كنت على أمل أن الموسم يتلغي أو يتأجل مثل مهرجانات الجونة والقاهرة أو الموضوع يهدى في فلسطين، ونقدر نعرض لكن مفيش حاجة بتحصل لحد دلوقتي في ناس عمالة تموت ومفيش حاجة بتحصل، فأنا إزاي أروح أعرض وناس بتموت في فلسطين، حاسس لو أنا عملت كده هبقى كأني زي اللي بقتلهم بالظبط، هبقى خذلتهم وهبقى بغني وأرقص، فأنا بعتذر عن عدم المشاركة في موسم الرياض واللي بيحصل في فلسطين قضية كل مسلم، وواجب على كل مسلم، فأنا مش في إيدي حاجة أقدر أقدمها، فلما نموت وربنا يسألنا عملت إيه لأخوك في فلسطين أنا هرد أقول إيه؟ هقول في وقت الأحداث في فلسطين أنا كنت بعمل مسرحية كوميدية وبرقص وأغني؟!، فأنا مش هقدر أعمل كده».
واستطرد محمد سلام: «كان عندي الموسم يتأجل أو يتلغى، فأنا مش هقدر أشارك في المهرجان ده وحابب أقول إني كنت في مشكلة مش عارف أسافر ولا أعمل إيه؟ والتمثيل هو أكل عيشي، لكن لو مسافرتش هل هموت من الجوع؟ بالتأكيد لا».